Prezidente Repúblika Kondekora Embaixadór Brazil Mauricio Medeiros de Assis ho Órdem TL

Hatutan.com, (28 Maiu 2024), Díli—Prezidente Repúblika (PR), José Ramos-Horta kondekora Embaixadór Repúblika Federativa Brazil iha Timor-Leste, Mauricio Medeiros de Assis, ho Ordem Timor-Leste grau collar.

Embaixadór Brazil, Mauricio Medeiros de Assis, simu kondekorasaun hosi Prezidente Repúblika José Ramos-Horta. Foto: Elio dos Santos da Costa.

Konsidera bá Papel no dezempeñu sira ne’ebé  Embaixadór Repúblika Federativa Brazil iha Timor-Leste, Mauricio Medeiros de Assis halo ho dedikasaun no profisionalizmu iha promosaun ba interese Timor-Leste nian.

Lee Mós: Membru Polísia Indonézia Simu Kondekorasaun Hosi Prezidente Repúblika Ramos-Horta

Rekoñese mós bá servisu pasadu sira ne’ebé interesadu bá relasaun bilaterál país rua nian no relasaun amizade entre povu nasaun rua bá promove pás, estabilidade no dezenvolvimentu nasionál Timor-Leste.

Ba apoiu no esforsu sira hodi benefisia Timoroan sira iha tinan hirak ikus ne’e maka Estadu Timor-Leste merese fó kondekorasaun nu’udár rekoñesimentu, ne’ebé mós haktuir iha dekretu Prezidente Republika alinea J artigu 85 K-RDTL, konjuga ho artigu 2 alinea a, hosi artigu 5, hosi Dekretu-Lei nú. 20/2009, loron 09 fulan-maiu.

Iha diskursu agradesimentu, Embaixadór Repúblika Federativa Brazil Mauricio Medeiros de Assis sente onradu simu kondekorasaun nu’udár rekoñesimentu hosi Estadu Timor-Leste.

Nia haktuir, tinan tolu ho balun hala’o servisu hanesan diplomata iha país irmaun Timor-Leste, nasaun ida ne’ebé respeita demokrasia, Direitu Umanu, Vida sidadaun sira nian no pás.

“Ha’u hein katak kooperasaun ne’ebé Brazil no Timor-Leste iha sei kontinua iha tinan sira mai oin, ha’u nia agradesimentu ba Governu no Estadu Timor-Leste,” Mauricio Medeiros de Assis agradese iha Palásiu Prezidensiál Nicolau Lobato Bairru-Pité, tersa (28/05/2024).

Iha fatin hanesan Prezidente Repúblika José Ramos-Horta dezeza felisidade no susesu  iha misaun sira tuir-mai.

Xefe Estadu konsidera kondekorasaun ida-ne’e nu’udár rekoñesimentu bá personalidade no dedikasaun iha produsaun no fortalesimentu Timor-Leste nian.

“Sente kontente ho prezensa fizika, simbolika, kultural no artistika Brazileiru iha Timor-Leste, no provavelmente sai hanesan icon iha Sudeste Aziátiku. Susesu iha misaun foun no boa viazen,” Prezidente Repúblika José Ramos-Horta hateten.

Marka prezensa iha serimónia kondekorasaun ne’e, Xefe Kaza Sivil Prezidénsia Repúblika, Asesór sira Palásiu Prezidensiál, familia kondekoradu no representante Ministeriu Negosius Estranjeirus no Kooperasaun.

Jornalista: Vito Salvadór