Xanana Deside Tenke Halo Auditória Internasionál bá Ró Haksolok no Aviaun ZEESM

Hatutan.com, (29 Maiu 2024), Dilí- Prezidente Autóridade Rejiaun Administrativu Espesial Oé-cusse Ambeno (RAEOA), Rogério Tiago de Fátima Lobato, hateten Primeiru-Ministru Kay Rala Xanana Gusmão deside tenke halo auditória internasionál bá Ró Haksolok no Aviaun ZEESM.

Lee Mós: Xanana Hameno bá Rogério Lobato: “Povu Oé-Cuse Haksolok Liu Bainhira Loke Auditoria bá Ró Haksolok”

Prezidente Autóridade RAEOA, Rogério Tiago de Fátima Lobato. Foto/Tome da Silva

Rogério Lobato  afirma maské nia nu’udár  Prezidente Autóridade RAEOA, maibé asuntu ida hanesan Ró Haksolok nia sei labele halo desizaun unilateral mesak.

“Ha’u tenke konsulta ho Primeiru-Ministru no Primeiru-Ministru  deside katák tenke halo auditória ida internasionál. Kona-bá Ro Haksolok, Primeiru-Ministru dehan katák halo auditória internasionál, ne’ebé nia dehan katák auditória internasionál nia rezultadu kuandu sai sei haksolok povu Timor-Leste tomak tanba povu Timor hatene verdade loloos kona-bá Ro ne’e,” Rogério Tiago Lobato haktuir bá jornalista sira iha Parlamentu Nasionál, Kuarta (29/05/2024).

Nia haktuir Ró Haksolok ne’e istoria ida  naruk sira halo pagamentu primeiru bá impreza Portugal nian katák impreza ne’e valida, katák nian bankrut tiha ona no nian iha divida barak bá banku sira iha Portugal. Nune’e, Rogério Lobato tenik, osan Timor nian atu selu nia bá la’ós atu selu ró maibé bá tiha fali impreza ne’e nian konta hodi selu nian tusan depois iha tinan liubá haruka tán millaun $14.

“Ami simu ona informasaun katák grave liu mak ida-ne’e katák estaleiru Figeiru ró ne’e la’ós privadu, maibé propriédade estadu  Portugal nian. Maibé, ita husik auditória mak sei la’o no depois ita sei hatene verdade loloos,” Nia subliña.

Nia esklarese mós katák Aviaun ZEESM ne’e naturalmente prosesu ne’e tenke bá iha oin, Primeiru-Ministru deside katák tenke halo auditória ida internasionál.

“Ne’e para ita labele dehan katák partidariza. Tenke iha Auditória internasionál ema husi li’ur mak halo sira mak sei bá mai rona RAEOA, rona tékniku sira hotu depois sira sei bá to’o iha nasaun Canada hodi rona autóridade diresaun sivíl Canada nian autória ne’ebé mak sira hakarak rona sira bele rona,” Rogério Lobato tenik.

Prontu Hatán Iha Tribunál Kona-bá Rezidénsia Fulolo

Prezidente Autoridade RAEOA Rogério Lobato, prontu bá hatán iha tribunál kona-bá keixa ne’ebé antigu prezidente Autoridade RAEOA, Mari Alkatiri submete bá Ministériu Públiku relasiona inspesaun ba rezidénsia Fulolo.

“Kona-bá uma Fulolo nian ne’e uma estadu nian. Sr. Mari Alkatiri laiha razaun atu lori ha’u bá tribunál. Ha’u la preokupa liu, ha’u prontu atu bá  hato’o iha tribunál,” Rogério Lobato afirma.

Nia esplika uma Fulolo ne’e uma Estadu nian tanba  lori osan Estadu nian hodi halo uma no la iha Lei dehan, katák alínea bens movel hanesan karreta motor ne’e bele, maibé bens moves hanesan uma ne’e laiha lei.

Rogério Lobato  haktuir nia iha dokumentu indiferimentu husi Diretór  Rejionál Teras no Propriedade Rejionál no Diretór Jerál husi Notariadu kona-bá pedidu  bá Prezidente Autóridade sestante RAEOA nian kona-bá sosa uma no rai Estadu nian iha Fulolo.

Nia hateten, Mari Alkatiri konsidera rezidénsia Fulolo hanesan nian uma privadu tenke iha eskritura públika liuhosi notáriu no notariadu Oé-Cusse sempre rekuza atu halo eskritura públika katák uma ne’e Marí Alkatiri nian.

Jornalista Estajiária : Zita Menezes