Polísia Detein Suspeitu Na’in-rua Tanba Tuda Ema iha Ponte CPLP

Hatutan.com, (03 Juñu 2024), Díli-Polísia Nasional Timor-Leste (PNTL) Munisípiu Díli detein suspeitu na’in-rua ho inisial TF ho J iha Sela detensaun tanba envolve iha kazu tuda vítima Januário iha área Fomento, Comoro, Díli, besik ponte CPLP II. 

Lee Mós: Fujitivu Arnolfo Teves Jr Hakerek Karta Espesiál ba ONU ho Papa Francisco

Suspeitu na’in-rua ne’ebé envolve iha asaun tuda ema iha Ponte CPLP, foin lalais ne’e. Foto/Tome da Silva

Komandante PNTL Munisípiu Díli, Superintendente Xefe Polísia Orlando Gomes, informa kronolójia katak,  insidente ne’e mosu iha Sesta kalan (31/06/2024), bainhira vítima sira ho motor tun hosi área Beduku atu liubá Bebonuk.

Bainhira to’o iha área Ponte Comunidade dos Países de Lingua Portuguêsa (CPLP) II  nian, mosu grupu ida maiória jovens ho fatuk tuda hasoru vítima sira ne’e, no rezulta vítima  monu ho motór ho kondisaun kanek gráve.

Komunidade sira ne’ebé hela besik, komunika bá ekipa sira iha Servisu Ambulánsia ninian ho Komandu PNTL Munisípiu Díli to’o kedas iha lokál kríme, hodi evakua vítima sira bá Hospital Nacional Guido Valadáres (HNGV), Bidau-Dili, hodi hetan tratamentu saúde intensivu.

Iha lokál insidente, Polísia mós rekolla evidénsia balu mak hanesan fatuk ho ai-belak, ne’ebé mak dadauk ne’e iha ona komandu Díli no kona-bá motivu hosi kazu ida ne’e, Investigadór sira sei halo prosesu investigasaun.

Informasaun hosi Polisia katak, kazu ne’e deskonfia envolve hosi suspeitu na’in-tolu, rua mak kapturadu, maibé mak  ida la konsege, tanba halai sees hosi fatin akontesimentu. Suspeitu ne’ebé halai hosi nia responsábilidade kriminal ne’e, deskonfia nu’udár sidadaun Repúblika Indonézia (RI) tanba ne’e maka Autóridade Polisia liuhosi nia ekipa servisu sekreta sira buka tuir nafatin hela.

Suspeitu TF ho J sei kumpre hela detensaun durante oras 72 iha Selela Detensaun Komandu Munisípiu Díli nian molok aprezenta hamutuk ho evidénsia sira bá Ministériu Públiku (MP).

Rejísta Kazu Asidente Tráfegu Hamutuk 110

Iha biban ne’e, Komandante Polísia Díli, Orlando Gomes informa mós dadus kona-bá kazu asidente Tráfegu sira ne’ebé mak durante ne’e mosu iha kapitál Díli, hahú hosi loron 1 to’o 31 Fulan-Maiu foin lalais ho totál 110. Hosi númeru kazu hirak ne’e, iha vítima ida mak lakon vida, kanek kaman 95, kanek todan 18.

Asidente Tráfegu sira ne’e mosu tanba ema ka sidadaun sira konsumu alkohol (tua) durante kondús transporte, inklui kondisaun karreta ho motór ne’ebé mak ladun diak hodi prejudika asidente sira ne’e iha fulan-Maiu nia laran.

“Iha kazu asidente hirak ne’e, iha mós balu ne’ebé mak ita prosesa to’o Ministériu Públiku, no kazu barak liu maka infratór sira deside rezolve tuir família de’it. Mais, la’ós Tranzitu mak rezolve sira, sira mai hamutuk iha Departamentu Tránzitu Munisípiu Dili nian fatin, no ita akompaña de’it sira buka solusaun ba akordu família,” Orlando Gomes haktuir bá jornalista sira, Segunda (03/06/2024).

Komandante Orlando Gomes informa mós katak, hosi kazu sira ne’ebé mak mosu iha área jurisdisaun Díli nian maka kazu agresaun fízika no Polisia  halo nafatin operasaun no patrullamentu iha tempu kalan hodi evita asidente no insidente sira.

Jornalista: Rogério Pereira Cárceres