Seidauk Bele Utiliza Ekipamentu Ra’ut Lixu iha Díli Tanba iha Hela Prosesu Inspesaun

Hatutan.com, (04 Juñu 2024), Díli-Ekipamentu ra’ut lixu nian, inklui karreta pezadu sira tula lixu nian ne’ebé kompañia internasionál China Nuclear Corporation  hatama bá Administrasaun Munisípiu Díli seidauk bele utiliza to’o ohin loron tanba sei iha faze inspesaun husi autoridade kompetente sira.

Lee Mós: Tempu Ona Atu Hamoos-Hadi’a Sidade Díli Hosi Lixu no Fahi-Luhan

Ekipa Pezadu ra’ut lixu sira-ne’e seidauk bele utiliza tanba sei iha prosesu inspesaun. Foto/Elio dos Santos da Costa

Iha loron 19 fulan-fevereiru 2024 kompañia internasionál China Nuclear Corporation ne’ebé manan konkursu fornesimentu ekipa pezadu no ekipamentu tau lixu ne’e entrega ba autoridade sira. Nune’e parte sira a deside halo inspesaun ne’ebé envolve hosi instituisaun estadu haat mak hanesan Project Management Unit (PMU) husi Autóridade Munisípiu Díli (PAM), Institutu Jestaun bá Ekipamentu Estadu (IJE), Comissão Nacional de Aprovizionamento (CNA), ho Ajénsia Dezenvolvimentu Nasionál (ADN)  hodi haree ninia kondisaun sira, molok hahú nia lansamentu bá operasionalizasaun.

Prezidente Autoridade Munisipiu Dili (PAMD), Gregório Saldanha informa katak, to’o oras ne’e ekipamentu lixeiru sira ne’e seidauk bele utiliza tanba instituisaun Estadu haat ne’ebé halo hela inspesaun seidauk finaliza.

“Prosesu la’o hela ne’e, iha dia 29 fulan-Maiu ne’e, hosi PMU, ajénsia munisipiu nian, halo monitorizasaun bá ekipamentu sira ne’e, sira hamutuk ho ADN, CNA, IJE, sira bá halo inspesaun finál ona. Inspesaun finál bá sasan sira ne’e, kondisaun halo nusá, sei di’ak hela, ka buat ruma aat, buat ruma falta, no kuandu falta, kompañia tenke kompleta, sé lae, ami lakohi simu. Sasán sira iha Tibar, balu iha ne’e, ho iha Caicoli. Sira halo tiha inspesaun, mais seidauk informa fali mai ha’u,”  Prezidente Autoridade Munisípiu Díli, Gregório Saldanha, hatete bá Hatutan.com iha kna’ar fatin Matadouro-Dili, Tersa (04/06/2024).

Gregório Saldanha dehan, bainhira atividade inspesaun ne’e konklui ona maka realiza seremónia entrega autoridade munisípiu Díli, depois halo prosesamentu,  bá instala ona sasán sira ne’ebé iha ne’e, iha estrada ibun sira, tanba tanke sira ne’ebé atu instala iha fatin lixu ne’e, balu metal, kalen ou besi, balu massa.

Ekipa Pezadu ra’ut lixu sira-ne’e seidauk bele utiliza tanba sei iha prosesu inspesaun. Foto/Elio dos Santos da Costa

Hatán kona-bá AMD presiza forsa traballu hira mak atu hala’o servisu rekolla lixu iha Dili, Gregório Saldanha dehan, parte kompañia China Nuclear mak sei halo jestaun bá material sira ne’e ho baze bá kontratu ida ne’ebé mak uluk halo ne’e.

“Kompañia Xinéz ne’e mak sei halo operasaun, no nia sei halo formasaun bá ita nia ema sira, tanba operasaun ne’e sei envolve mós ita nia maluk Timoroan sira,”  nia informa.

Kompañia Importa Sasán La Tuir Kontratu

Prezidente Autoridade Munisípiu Díli, Gregório Saldanha salienta, prosesu operasionalizasaun bá rekolla lixu iha kapitál Díli seidauk akontese razaun ida mós tanba kompañia kontratór importa ka hatama, iha karreta ida mak ninia espesifikasaun ne’e la tuir iha kontratu.

“Lae!, ida ne’e laiha fallansu. Iha sasán balu maka la tuir kontratu, sira informa ne’e iha karreta ida la tuir kontratu. Ne’ebé, iha opsaun rua de’it bá sira. Ida, nia hatama fali foun, ka opsaun segundu, hamenus présu de’it. Karreta nia kontratu ne’e labele selu tuir ida uluk halo kontratu ne’e, tanba karreta nia kondisaun la-hanesan ho iha kontratu. Bele nia troka karreta foun ka hatuun présu de’it, koa de’it osan,” Gregório Saldanha haktuir.

Ekipa Pezadu ra’ut lixu sira-ne’e seidauk bele utiliza tanba sei iha prosesu inspesaun. Foto/Elio dos Santos da Costa

Tuir lista ne’ebé Hatutan.com asesu nota katak, Ekipamentu Pezadu Operasaun Projeto Resido Solido (RSU) nian ne’ebé fornese hosi kompanha internasionál China Nuclear Corporation  mak hanesan;

1. Kontentor plastiku litru 120 unidade 1.000
2. Kontentor plastiku litru 240 hamutuk 5.000
3. Kontentor plastiku litru 1100 hamutuk 1820
4. Kontentor metal litru 1100 hamutuk unidade 200
5. Kontentor metal 8m3 skip bin hamutuk 131
6. Kontentor metal 20m3 skip bin hamutuk unidade 14
7. Motorizada trike moto de tres rodas hamutuk unidade 10
8. Kamioneta ba kolesaun 8m3 rear loading compactor unidade 4
9. Kamioneta koleasaun 13m3 rear loading compactor hamutuk unidade 6
10. Kamioneta ba kolesaun 20m3 rear loading compactor unidade 6
11. Kamioneta ba kolesaun hook lift truck unidade 10
12. Kamioneta kolesaun Dump Truck (Light truck) unidade 3
13. Kamioneta ba service container washing truck hamutuk 2
14. Kamioneta ba manutesaun mobile workshop unidade 2
15. 

    Karreta sira ne’ebé atu tula lixu iha Díli laran. Foto/Elio dos Santos da Costa

    
    Kamioneta dasa Estrada hamutuk 2
16. Kamioneta ba operasaun iha ateru sanitaria unidade ida
17. Monitoriza ambiental (portable gas monitor) unidade rua
18. Portable water meter unidade rua
19. Landfill compactor ekipamentu operasaun sanitariu iha Tibar ida
20. Tracker excavator ida, articulater dump truck ida, crawler tractor (Bulldozer) green waste shredder ka makina operasaun iha ateru sanitariu Tibar hamutuk 2
21. Tanke bee nian hodi halo operasaun ateru sanitariu iha Tibar unidade ida.

Ekipamentu pezadu hirak ne’e hanesan ekipamentu modernu hodi rekolla lixu ho teknolójia ne’ebé kompleta kedan ho nia lixeiru idak-idak.

Jornalista: Rogério Pereira Cárceres