Tribunál Rekursu Liberta Fujitivu Teves Jr Oras Balun De’it Polísia Kaptura Fali

Hatutan.com, (10 Juñu 2024), Díli-Supremu Tribunál Justisa ka Tribunál Rekursu, Segunda (10/06/2024), hale’u tuku 18.00 Otl, liberta fujitivu Arnolfo Teves JR husi prizaun preventiva. Maibé Arnolfo Teves Jr goza nia liberdade oras balun de’it tanba hale’u tuku 18:37 Otl,  Polísia Nasionál Timor-Leste (PNTL) liuhusi Departamentu Investigasaun Kriminál Nasionál (DIKN) kaptura fali deit Arnolfo Teves Jr hodi bá detein iha sela detesaun Polísia nian.

Lee Mós: Molok Foti Desizaun, Supremu Tribunál Justisa Sei Rona Testemuña husi Fujitivu Arnolfo Teves Jr

PNTL liuhusi DIKN kaptura hikas fujitivu Arnolfo Teves Jr iha fatin balun iha Díli hafoin Tribunál Rekursu liberta oras balun nia laran, Segunda (10/06/2024). Foto/Elio dos Santos da Costa

Ekipa DIKN kaptura  fujitivu Arnolfo Teve Jr, iha faitin balu iha kapitál Dili, hodi lori bá prosesu investigasaun kriminal bazeia bá Karta Mandadu Detensaun hosi Tribunál Rekursu  ho NCU: 0024.TRDIL, no Númeru Prosesu 48/INQ/2024/TR.

Ekipa DIKN lori kedan fujitivu ho nasionalidade Filipina ne’e bá halo indentifikasaun no investigasaun iha Centro Integrado de Gestão de Informação e da Investigação Crime Organizado iha kuartel jerál PNTL, Caicoli, Díli. Durante prosesu ne’e, fujitivu Arnolfo Teves Jr akompaña  husi nia Advogadu privádu estranjeiru na’in-rua, feen-kaben no oan-mane.

Hafoin termina tiha prosesu ida ne’e, ekipa DIKN transporta kedas fujitivu Teves Jr bá detein iha Sela Detensaun Komandu PNTL Munisípiu Díli, durante oras 72, tuir prazu tempu ne’ebé hatuir iha lei penal Timor-Leste nian.

 Karta Libertasaun

Haktuir bá karta Mandadu Detensaun ne’ebé Hatutan.com, katak, Tribunál Rekursu hasai karta rua; primeiru mak karta bá libertasaun nian, no tuir fali maka karta ida kona-bá Mandadu Detensaun.

Iha karta libertasaun nian ne’e, informa katak, haree bá desizaun husi Plenária Tribunál Rekursu nian antes ne’e, iha ne’ebé aplika tiha ona medida koasaun ne’ebé estraditadu Arnolfo A. Teves Jr., haree katak ábatempu ne’ebá laiha medida koasaun.

PNTL kaptura hikas fujitivu Teves Jr, Segunda kalan (10/06/2024). Foto/Elio dos Santos da Costa

Prosesu estradisaun ne’e hala’o tiha ona iha faze julgamentu, iha ne’ebé sei produz evidénsia testemuña ne’ebé oferese (artigu 54 númeru 1 Lei Númeru 15/2011 26 Outubru). Tanba prosesa tiha ona pedidu extradisaun, kompriende katak medida koasaun balun nesesáriu.

Nune’e, bazeia bá dispozisaun sira iha Artigu 184 númeru 2 (Segunda Parte) no 217 númeru 1 alinea (b) Kodigu Prosesu Penal no númeru 3, númeru 2 Lei 15/2011 26 Outubru, Tribunál haruka atu kaer kedas Arnolfo A. Teves JR hodi aplika medida koersivu hafoin rona.

Informasaun seluk ne’ebé Hatutan.com asesu, ohin, katak, iha Tersa (11/06/2024), tuku 09:00 Otl, fujitivu Teves Jer tenke submete fila-fali bá Tribunál Dil  kontinuasaun julgamentu bá ninia kazu, liu-liu sei rona desizaun ikus hosi Juiz sira nian ligadu bá kazu ne’ebé deskonfia komete  iha ninia país oríjen (Filipina-red).

Lee Mós: Fujitivu Arnolfo Teves Jr Hakerek Karta Espesiál ba ONU ho Papa Francisco

 Jornalista: Rogério Pereira Cárceres