Nova Zelándia Kontinua Apoia TL iha Área Edukasaun-Turizmu

Hatutan.com, (12 Juñu 2024), Díli—Vise Primeiru Ministru Nova Zelándia, Winstons Peters komprometidu atu kontinua fó apoiu Timor-Leste (TL), iha seitór edukasaun no turizmu.

Vise Primeiru Ministru Nova Zelándia, Winstons Peters hala’o enkontru ho Vise-Primeiru-Ministru Asuntu Ekonomiku no Ministru Turizmu no Ambiente Francisco Kalbuadi Lay iha edifisiu Farol, kuarta (12/06/2024). Foto: Vito Salvadór.

“Nova Zelándia nafatin iha kompromisu atu apoia ekonomia Timor-Leste nian, liu hosi apoiu bá edukasaun no turizmu,” Winstons Peters hateten iha edifísiu Minisériu Turizmu no Ambiente, Farol, tersa (12/06/2024).

Lee Mós: Governu TL-Nova Zelándia Diskute Dezenvolvimentu Seitór Turizmu ho Kapasitasaun Rekursu Umanu

Vise Primeiru Ministru ne’e agradese bá oportunidade bele hasoru-malu ho Primeiru-Ministru interinu no Vise Primeiru Ministru Asuntu Ekonomiku no Ministru Turizmu no Ambiente, Francisco Kalbuadi Lay tanba enkontru la’o di’ak tebes ho hanoin sira ne’ebé fahe kona-bá dezenvolvimentu Timor nia futuru.

Timor-Leste ho Nova Zelándia hanesan paíz rua ne’ebé belun di’ak no iha legasia  ne’ebé forte dezde dékada tolu ka haat bá kotuk.

“Nova Zelándia sei Kontinua apoia Timor-Leste nia adezaun bá ASEAN liu hosi asesu bá formasaun lian Inglés no formasaun sira seluk ne’ebé bele tulun hasa’e abilidade no koñesimentu Timor oan sira nian,” nia tenik.

Parabeniza Adezaun bá OMK

Winstons Peters parabeniza Vise-Primeiru-Ministru Asuntu Ekonomiku no Ministru Turizmu no Ambiente Francisco Kalbuadi Lay ne’ebé ho konviksaun no matenek lori Timor-Leste bá adere ba Organizasaun Mundiál Komérsiu (OMK).

Iha fatin hanesan, Francisco Kalbuadi Lay hateten Nova Zelándia desde uluk kedan apóia Timor-Leste iha area sira importante bá dezenvolvimentu umanu no Ekonomiku.

“Onra tebes ohin loraik simu Vise Primeiru-Minustru Nova Zelándia. Nova Zelándia belun di’ak tebes la’ós foin agora maibé dezde uluk kedan liu husi área kapasitasaun rekursu umanu nune’e mós iha area defeza,” Francisco Kalbuadi Lay hateten.

Ba oin Timor-Leste sei esplora liután kooperasaun ho Nova Zelándia hodi bele apoia dezenvolvimentu Timor-Leste nian.

Jornalista: Vito Salvadór