Sidadaun Estranjeiru Besik 1100 Sei Partisipa Vizita Papa Francisco iha Timor-Leste

Hatutan.com, (12 Juñu 2024), Díli-Diretóra Jerál Servisu Migrasaun (SM), Adelaide da Rosa informa, posibilidade sidadaun estranjeiru hamutuk 1100 sei partisipa misa ne’ebé prezide husi Papa Francisco iha Tasi-Tolu,  Díli, Timor-Leste.

Lee Mós: Vatikanu Hakarak Fatin Vizita Papa Francisco Hakmatek no Seguru bá Timoroan Hotu

Diretóra Jerál Servisu Migrasaun (SM), Adelaide da Rosa. Foto/Elio dos Santos da Costa

Númeru hosi sidadaun estranejeiru hirak ne’e sai nu’udár espetativa ida ne’ebé mak ekipa Servisu Migrasaun sira kálkula hela, no sira ne’e mai hosi nasaun viziñu sira mak hanesan Indonézia, Austrália, no bele mós rai seluk tán. Papa Francisco sei vizita Timor-Leste husi loron 09 to’o loron 11 fulan-Setembru 2024.

“Espetativa ne’ebé maka ita espekta ne’e, ema mau husi rai-li’ur 1100 mak sei ultrapasa hosi fronteira hodi  mai partisipa iha selebrasaun misa vizita Papa Francisco nian iha Díli,”  diretóra jerál Servisu Migrasaun, Adelaide da Rosa hatete bá jornalista sira iha kna’ar fatin Servisu Migrasaun, Vila-Verde, Dili, Kuarta (12/06/2024).

Nia hateten, espektasaun ne’e tenke iha, atu nune’e Servisu Migrasaun bele halo preparasaun adekuadu hodi responde bá atividade sira ne’e. Maibé, koordenasaun sira hala’o namanas hela, atu nune’e oinsa bele jere ema hirak ne’e mai, la’o ho kontroladu no labele viola fali lei ruma.

“Hanesan ita hatene, Indonézia ne’e ita fó free-visa (vistu lívre), ne’ebé sira tama ho vistu turista hodi mai partisipa de’it iha eventu ne’e, no ne’e tenke organizadu liuhosi parte Igreja mak tenke envolve iha laran, atu nune’e, bele fasilita sira nia movimentu hosi sira nia nasaun mai iha ita nian, depois fasilita fali sira nia movimentu fila bá sira nian nasaun,”  nia esplika.

Relatóriu Fulan-lima

Iha biban ne’e, diretóra jerál Servisu Migrasaun (SM) Adelaide da Rosa atualiza mós atividade sira Servisu Migrasaun inian hahú hosi fulan-Janeiru to’o  fulan-Maiu 2024, hanesan tuir mai;

Primeiru maka, asegura nafatin IX Governu Konstitusional ninia programa hodi haforsa Sistema Jestaun Fronteira, liuhosi mellora di’ak liután kontrolu iha postu fronteira sira, nomós hala’o kontrolu bá permanénsia ema estranjeiru sira iha territóriu nasionál, atu garantia utilizasaun vistu ne’ebé loos, tuir Lei Migrasaun no Azilu Timor-Leste.

Alende ne’e, partisipa mós iha atividades internasionál no mós atividades nasionál Realiza enkontru daruak bá kooperasaun entre imigrasaun Austrália no Imigrasaun Timor-Leste no TL rasik maka sai hanesan uma-na’in bá iha enkontru refere.

SM realiza mós seremónia lansamentu bá emisaun vistu iha rai-liur no reativa atendimentu públiku iha sede delegasaun territórial Rejiaun Administrativa Espesial Oecusse Ambeno (RAEOA).

Atividade formasaun mós hala’o no kapasitasaun bá iha pesoal Imigrasaun sira, hodi nune’e bele aumenta tán sira ninian kapasidade, atu nune’e bele jere servisu di’ak liután bá iha futuru.

Partisipa mós iha enkontru sira bá preparasaun vizita Amu Papa nian mai iha TL. Purtantu, hahú hosi loron 1 fulan-Janeiru to’o loron 31 fulan-Maiu 2024, Servisu Migarasun mós rejísta movimentu ema tama mai territóriu nasionál hamutuk ema 1100-resin) no ema sai husi territóriu nasionál hamutuk ema 1100-resin.

“Halo abandona voluntáriu bá sidadaun estranjeiru hamutuk na’in-46, hala’o mós prosesu delijénsia simples bá sidadaun estranjeiru sira ne’ebé mak envolve iha violasaun vistu, no hala’o atividade profesionál sein vistu, hamutuk kazu 230,” diretóra Adelaide informa.

Durante fulna-lima nia laran ne’e, reseita estadu ne’ebé mak Servisu Migrasaun kolekta hahú hosi loron 1 fulan-Janeiru to’o loron 31 fulan-Maiu 2024, liuhosi Emisaun Vistu, Estensaun Vistu no mós Aplika Koima, hamutuk rihun U$852,20.

Jornalista: Rogério Pereira Cárceres