Idul Adha Fó-Hanoin Kona-bá Identidade, Espíritu Unidade no Toleránsia Relijiozu

Hatutan.com, (17 Juñu 2024), Díli- Prezidente Repúblika (PR), José Ramos-Horta hateten selebrasaun loron Idul Adha fó-hanoin hikas kona-bá identidade relijiaun, espíritu unidade no toleránsia relijiozu iha Timor-Leste.

Lee Mós: Musulmanu Timor-Leste Selebra Idul Adha 1445 H

Prezidente Repúblika José Ramos-Horta hato’o deklarasaun ne’e hodi parabeniza komunidade Musulmanu iha Timor-Leste no mundu tomak ne’ebé ho neon no fiar tomak selebra loron Idul Adha 1445 Hijriah.

Komunidade Musulmanu Timor-Leste selebra loron Idul Adha 1445 Hijriah iha Meskita An-nur, Kampu Alor, Díli. Foto/Elio dos Santos da Costa

Iha komunikadu bá Imprensa ne’ebé Hatutan.com asesu husi Gabinete Média Palásiu Prezidensiál, Segunda (17/06/2024), Prezidente Repúblika José Ramos-Horta hateten hodi povu Timor-Leste nia naran hato’o votu kmanek liubá imi hotu iha okaziaun Ksolok Idul Adha 2024.

Idul Adha fó-hanoin mai ema kona-bá lisaun kle’an sira ne’ebé ema aprende husi istória dispozisaun profeta Ibrahim hodi sakrifika nia oan-mane obediénsia ba orden Maromak nian. Tempu atu refleta kona-bá valór sira husi ita-nia an rasik, devosaun, no forsa husi ita-nia konviksaun.

“Iha loron ne’e, ha’u hakarak rekoñese kontribuisaun ne’ebé boot husi maun-alin no inan-feton Musulmanu sira-nian bá ita-nia sosiedade Timor-Leste. Imi-nia kompromisu bá fiar, família, no komunidade sira-ne’e hala’o ona papél importante ida hodi forma ita-nia nasaun nia identidade no haburas espíritu unidade no komprensaun,” PR Horta hateten.

 Xefe Estadu hatutan Ho selebrasaun Idul Adha, iha okaziaun Ksolok ida ne’e, mai hatutan fali kompromisu ba relijiaun nia armonia no respeitu malu.

“Iha Timor-Leste, ita orgullu tebes ho ita-nia diversidade no ko-ezisténsia pasifika husi fiar oioin. Ha’u hein katak Idul Adha ida-ne’e bele hametin liután relasaun irmaun-irman sira-nian iha sidadaun hotu-hotu nia leet, la haree ba sira-nia fiar relijioza,” Ramos-Horta subliña.

Durante selebrasaun ida-ne’e, mai hanoin-hetan mós maluk sira ne’ebé iha susar nia laran, fó apoiu no laran-sadi’a ba sira. Idul Adha nia esensiál loos mak fahe ita-nia bénsaun no lori ksolok ba ema seluk nia moris.

Dala ida tan, hato’o votu Kmanek ba imi hotu ne’ebé selebra Idul Adha ho haksolok, dame, no prosperidade. Hein katak Idul Adha nia espíritu sei lori ksolok, unidade no kumprimentu espirituál ba Musulmanu sira iha Timor-Leste no mundu tomak.

 Jornalista: Vito Salvadór