Xanana Selebra Loron Moris bá Dala-78 ho Kiik-oan Sira iha Palásiu Prezidensiál

Hatutan.com, (20 Juñu 2024), Díli—Primeiru-Ministru (PM), Kay Rala Xanana Gusmão, selebra nia aniversáriu natalisiu ba dala-78 (20 Juñu 1946-20 Juñu 2024) ho Preizdente Repúblika (PR), José Ramos-Horta no labarik sira iha Palásiu Prezidensiál Nicolau Lobato Bairru-Pité.

Xanana selebra loron moris bá dala-78 ho kiik-oan sira iha Kantina Matak, Palásiu Prezidensiál, Díli, Kinta (20/06/2024). Foto/Elio dos Santos da Costa

Selebrasaun simples ne’e realiza hafoin enkontru semanál ho Prezidente Repúblika José Ramos-Horta,  Kinta (20/06/2024). Nune’e, PR Ramos-Horta akompaña Xanana hakat direta bá iha Kantina Matak iha Palásiu Prezidensiál kotuk hodi hamutuk ho labarik sira ne’ebé kada loron bá han iha ne’eba.

Bainhira Primeiru-Minustru Kay Rala Xanana Gusmão hakat tama bá Kantina Matak, labarik sira simu kedan ho basa-liman no haklalak fó parabéns.

“Imi di’ak ka la’e? Imi kontente ka la’e? Tenke estuda, badinas no mós disiplina,” Primeiru-Ministru hasé labarik sira ho kontente.

Komandande ein-Xefe FALINTIL ne’e simu mós prendas Tais hosi Jestora kafetaria BCB no prezente dose tinan nian hosi jestór sira Kantina Matak hamutuk ho labarik sira iha fatin ne’e.

Iha fatin ne’e Prezidente Repúblika José Ramos-Horta fó parabéns bá Primeiru-Ministru Kay Rala Xanana Gusmão ne’ebé selebra aniversáriu natalisiu.

“Parabéns bo’ot Avo Nana, nia halo tinan-78, maibé saúde di’ak loos. Maski kalan toba iha tuku 01 dader, tanba halo servisu barak, estuda no partisipa Konferénsia virtuál oin-oin maibé hader sedu iha tuku 04 dader no lokraik la deskansa maibé nia saúde di’ak loos. Idade la’o daudaun bá oin nafatin servi povu ne’e,” Ramos-Horta parabeniza.

Iha dadeer, Primeiru-Ministru Kay Rala Xanana Gusmão selebra ona ho misa agradesimentu iha Igreja Parókia Imaculada da Conceição Balide.

Jornalista: Vito Salvadór