Projetu Konstrusaun Estrada Protokolu Tasi-tolu Atinje 50%

Hatutan.com, ( 21 Juñu 2024), Díli–Ministru Obras Públikas (MOP), Samuel Marçal relata  progresu konstrusaun estrada protokolu iha área Tasi-tolu, Postu Admistrativu Dom Aleixo, Munisípiu Díli atinje ona 50%.

Lee Mós: Projetu Adjudikasaun Direta Estrada Kristu Rei ba Dolok-Oan La Tau Valor Orsamentu iha Kuadru Informasaun

Projetu konstrusaun Estrada protokolu Tasi-tolu. Foto/Espesiál

Ministru Samuel Marçal informa Governu kontinua aselera konstrusaun estrada refere atu bele konklui iha fulan-Agostu 2024 molok vizita Papa Francisco mai Timor-Leste (TL) iha loron 09 to’o loron 11  fulan-Setembru, tinan ne’e.

“Preparasaun kuaze 50% konklui tanba servisu dala-ruma to’o kalan atu aselera. Espera iha fulan-Agostu nia rohan bele konklui ona, hanesan estrada iha Tasi-tolu inklui estrada sira ne’ebé durante ne’e udan sobu iha Díli laran,” Samuel Marçal hateten hafoin enkontru ho Primeiru-Ministru (PM) Kay Rala Xanana Gusmão iha Palásiu Governu, Sesta ( 21/06/2024)

Ministru Samuel Marçal  mós klarifika kona-bá fatin sira ne’ebé foin lalais hetan despeju administrativu hosi Sekretária Estadu Asuntu Toponímia no Organizasaun Urbana (SEATOU), liu-liu iha área Bidau nian, daudaun ne’e ekipa halo hela mobilizasaun material atu hahú konstrusaun.

Samuel Marçal mós ko’alia ona ho SEATOU atu molok sobu fatin sira iha área tasi-ibun no fatin sira seluk presiza halo koordenasaun didi’ak ho tékniku MOP nian atu prepara uluk dezeñu, nune’e sobu hotu avansa kedan ho konstrusaun.

Jornalista: Leopoldina de Carvalho