CFP Sei Foti Medida Hasoru Funsionáriu Públiku Sira Ne’ebé Envolve GAM-GAR

Hatutan.com, (25 Juñu 2024), Díli-Komisaun Funsaun Públika (CFP-sigla portugês) sei foti medida  todan ka rigorózu hasoru funsionáriu públiku sira ne’ebé mak durante ne’e envolve iha Grupu Arte-Marsiál (GAM) ho Grupu Arte-Rituál (GAR).
Lee Mós: Taka GAM-GAR Taka Mós KRAM

Prezidente CFP, Agostinho Letêncio de Deus. Foto/Tome da Silva

Prezidente CFP, Agostinho Letêncio de Deus informa, dadaun ne’e CFP servisu hamutuk  ho Ministériu Juventude, Desportu, Arte no Kultura (MJDAK) liuhosi Komisaun Regula Arte- Marsiál (KRAM) halo dezaminasaun bá liña ministereiu  sira liu-liu bá munisípiu sira mak hanesan Aileu, Baucau, atu funsionáriu públiku sira rasik bele hatene katak, iha lei atu regula entre funsionáriu públiku sira ne’ebé mak envolve iha GAM ho GAR.

“Sé kaer toman membru funsionáriu públiku iha fatin treinu karik, medida sira ne’e iha ne’ebá definidu tiha ona,”  Prezidente CFP, Agostinho Letêncio de Deus hateten bá Jornalista sira, hafoin aprezenta relatóriu diagnóstika no planu reforma administrasaun públika nian bá Primeiru-Ministru Kay Rala Xanana Gusmão iha Palásiu Governu, Díli, Tersa (25/06/2024).

“Sé funsionáriu públiku ida, nia definisaun iha ne’ebá kuaje hothotu, medidas saida mak komisaun funsaun públika sei fó ne’e iha tiha ona, no agora depende bá iha terrenu ne’e saida mak akontese. Medida ida mak purézemplu, até funsionáriu ne’e bele hetan prizaun. Ne’e meddida ida ne’ebé mak define iha lei ne’e,”  nia tenik.

Hatán kona-bá CFP iha ona mós dadus funsionáriu públiku sira ne’ebé durante envolve iha atividade GAM-GAR, prezidente  CFP Agostinho Letêncio dehan, la presiza fó sai bá públiku, maibé mós ida KRAM de’it mak hatene liu.

Molok ne’e IX Governu Konstitusional liuhosi sorumutu Konsellu Ministru sira-nian aprova rezolusaun Governu ho Númeru 45/2023, 10 Novembru, hodi halo Suspensaun bá Atividade Prátika Arte-Marsiál iha Timor-Leste.

Baze bá rezolusaun ida ne’e fó biban bá KRAM ho komandu PNTL hodi halo re-fiskalizasaun bá GAM Persaudaraan Setia Hati Terate (PSHT), Ikatan Keluarga Sakti, Putra Timor-Leste (IKS-PTL) ho Kmanek Oan Rai Klaran (KORK), inklui GAR Sete-Sete (77) sira-ninian atividade sira tenke tuir lei.

 Jornalista: Rogério Pereira Cárceres