Labele Bandu Jornalista sira Halo Kobertura iha HNGV

Hatutan.com, (25 Juñu 2024), Díli–  Provedoria Direitu Umanu no Justisa (PDHJ),  Virgílio da Silva Guterres, husu pesoál sira iha Ospitál Nasionál Guido_Valadares  (HNGV) atu labele bandu jornalista sira halo kobertura iha HNGV tanba fatin públiku.

Lee Mós: HNGV Enfrenta Problema Overload Pasiente no Estoke Out Ai-moruk 11%

Liuhusi plenária PN, Tersa (25/06/2024), Xefe Bankada PLP, Maria Angelina Sarmento, koloka kestaun karta sirkulár  ida ne’ebé HNGV fó sai hodi husu jornalista sira halo kobertura iha HNGV la iha autorizasaun.

Provedór Virgílio da Silva Guterres vizita HNGV foin lalais ne’e. Foto/Elio dos Santos da Costa

“Tuir kódigu penál Timór_Leste  nian, provedór nia haree ba kestaun ne’e oinsá, problema saúde ema hotu hakarak rona, ema hotu hakarak hatene informasaun loloos, maibé HNGV taka informasaun  sirkulár ida  fó sai atu mídia sira labele halo publikasaun ka divulga informasaun ba asuntu sira ne’ebe akontese iha HNGV,” Deputada Maria Angelina Sarmento afitma.

Hatán bá preokupasaun ne’e, Provedór Virgílio da Silva Guterres hateten, ospitál ne’e  espasu públiku tamba ne’e laiha proibisaun bá jornalista, labele iha proibisaun  ba jornalista sira atu asesu informasaun iha HNGV. Jornalista sira iha kódigu étika ne’ebé mós regule atu labele fahe informasaun sira ne’ebe mak viola ema nia privasidade, viola ema nia dignidade liu-liu privasidade  pasiente sira nian iha ne’ebá. Tamba ne’e ha’u fiar katak Jornalista sira ne’e iha Kode étika ona. Maibé,  bandu atu jornalista  labele ba HNGV iha kualkér momentu ne’e violasaun lei Komunikasaun Sosiál no ida ne’e ita viola mós direitu sidadaun nian atu hetan informasaun husi setór públiku sira hanesan setór saúde ho ospitál,”   prezidente Conselho de Imprensa de Timor-Leste períodu 2016-2023 ne’e hateten.

PDHJ rekomenda bá HNGV  atu regularmente fó sai  informasaun ba públiku kona-bá situasaun ne’ebe HNGV enfrenta atu nune’e públiku bele  akompaña no evita espekulasaun kona-bá situasaun sira loloos iha HNGV.

Iha biban ne’e membru PN husi Bankada CNRT, Lucia Taequi husu PDHJ atu halo esplikasaun klaru kona-bá monitorizasaun  ba HNGV no sentru saúde hira ona mak OPDHJ halo monitorizasaun.

“Ami iha Uma fukun parlamentu ne’e hakarak hatene saúde ne’e kolapsu ona liga ho stock ai-moruk laiha ho ida-ne’e ha’u hakarak hetan esplikasaun durante PDHJ halo monitorizasaun,” Deputada  Lucia Taequi hateten iha nia intervensaun iha plenária PN.

Deputada Bankada PLP, Maria Angelina Sarmento liatun hikas iha parte prizioneiru sira-nia iha direitu atu asesu ba saúde, maibé sira la bele hetan tratamentu di’ak tanba menus husi ai-moruk, iha prizaun Becora, Suai no mós prizaun Gleno-Ermera.

“Ha’u hakarak husu ai-moruk mak laiha duni ka sira-nia kondisaun mak la bele atu fasilita sira, bele hetan tratamentu saúde di’ak, tanba atu dehan de’it iha Dili mós HNGV de’it mós sei menus ai-moruk, iha sentru saúde iha Timor laran de’it mós iha problema ai-moruk ,atu fó tan ba prizioneiru sira ne’e ha’u hanoin susar uitoan,” Deputada Maria Angelina Sarmento hateten.

Provedór Virgílio Guterres, informa hikas, iha fulan kotuk antes haree ba publikasaun iha públiku no mós ezijénsia ba iha PDHJ, liuhusi media sosiál. Nune’e, PDHJ halo monitorizasaun bá HNGV no Ospitál Oé-Cusse, ai-moruk reajente 13% mak stock out, ba konsumoveis sira ne’e 11% dadus, fatin la to’o ba pasiente sira atu toba, entaun pasiente sira okupa korredór atu tau kama iha ne’ebá.

Jornalista Estajiária: Isabel Pires/Dircia Ximenes Guterres