Governu Sei Dijitaliza Sistema Saúde Timor-Leste

Hatutan.com, (28 Juñu 2024), Díli- IX Governu Konstitusionál sei halo dijitalizasaun ba setór saúde iha Timor-Leste hodi kontrola ai-moruk no hatuur padraun  ba pratika iha Ospitál Nasionál, Referrál no klínika sira hodi garante kualidade atendimentu no prevene falta ai-moruk.

Lee Mós: Bankada FRETILIN Enkoraja Entidade Hotu Kontīnua Kritika Governu Hadi’a Problema iha Setór Saúde

Estoke ai-moruk iha armazéns INFPM. Foto/Tome da Silva

Vise-Primeiru-Ministru no Ministru Koordenadór ba Asuntu Sosial no Ministru Dezenvolvimentu Rural no Abitasaun Komunitária, Mariano Assanami Sabino ba jornalista sira iha Palásiu Prezidensiál, Sesta (28/06/2024) hateten, setór saúde ne’e hanesan asuntu ne’ebé maka governu konsentra atu hadi’a para  dijitaliza oinsá sosa ai-moruk, rai ai-moruk, no oinsá distribui tamba ai-moruk dalaruma lakon, dalaruma mai estraga tanba liu prazu no balun  ai-moruk iha maibé labele distribui tamba aat.

“Dijitalizasaun ba setór Saúde ne’e prioridade no importante para hatene lolos ai-moruk ne’e ba iha ne’ebé, material klínika ba operasaun, iha manutensaun ka lae, iha padraun ba pratika, safety ba ema sira ne’ebé ba Ospitál, asesu ba bee-moos, eletrisidade la bele mate iha ospitál sira,” Mariano Assanami Sabino hateten.

Vise-Primeiru Ministru ne’e hakru’uk ba Pesoál Saúde sira, enfermeira, Doutór sira ne’ebé servisu ho paixaun, ho fuan no laran tamba kna’ar ne’e hanesan vokasaun ida, tan ne’e hein katak profisionál saúde sira sei koopera no sei servisu hamutuk.

Labele Politiza Edukasaun no Saúde

Vise-Primeiru-Ministru no Ministru Koordenadór ba Asuntu Sosial no Ministru Dezenvolvimentu Rural no Abitasaun Komunitária, Mariano Assanami Sabino hateten setór Saúde no Edukasaun nu’udár asuntu rua ne’ebé importante no labele politiza, oan sira matenek para ba futuru, kakutak saudavel para atu serbí rai-ne’e.

“Partidu hotu-hotu no polítiku hotu-hotu tenke konserva setór saúde no Edukasaun nu’udár estadu nia importánsia no futuru,” Mariano Assanami Sabino tenik.

Jornalista: Vito Salvadór