TL-Mosambique Sei Asina Akordu Kooperasaun iha Área Importante Tolu

Hatutan.com, (05 Jullu 2024), Díli—Timor-Leste (TL) ho nasaun Mosambique sei asina akordu kooperasaun iha área importante tolu mak hanesan, promove kooperasaun bá karbonetus no minas nian, edukasaun iha nível ensinu superiór no kria mekanízmu de konsulta no diskusaun bá kooperasaun.

Ministru Negósius Estranjeirus no Kooperasaun (MNEK), Timor-Leste, Bendito dos Santos Freitas ho deleasaun hala’o sorumotu ho Ministra Negósius Estranjeirus no Kooperasaun Mosambique, Verônica Mocamo hodi diskute kona-bá reforsu kooperasaun bilaterál entre nasaun rua iha seitór importante sira, iha Mosambique. Foto: MNEK

Assuntu ne’e hosi Ministru Negósius Estranjeirus no Kooperasaun (MNEK), Timor-Leste Bendito dos Santos Freitas hafoin ho deleasaun hala’o sorumotu ho Ministra Negósius Estranjeirus no Kooperasaun Mosambique, Verônica Mocamo  hodi diskute kona-bá reforsu kooperasaun bilaterál entre nasaun rua iha seitór importante sira, iha Mosambique.

Lee Mós: Luis Miguel Embaixadór Dezignadu bá Repúblika Mosambique

“Assuntu importante ne’ebé hanesan parte integrante hosi vizita ida-ne’e maka, iha akordus tolu ne’ebé sei asina ho Mosambique,” Hatutan.com sita deklarasaun Bendito Freitas iha komunikadu, kinta (04/07/2024).

Ministru ne’e esplika, akordu iha área edukasaun tanba presiza dezenvolve liután kooperasaun ho Governu Mosambique kona-bá eskola CAFE inklui mós seitór justisa nian, nune’e bele kontribui bá dezenvolvimentu kapitál umanu iha Timor-Leste iha futuru.

Alende ne’e, Repúblika Mosambique iha kompromisu hakarak hametin Kooperasaun Bilaterál ho Timor-Leste (TL) iha seitór saúde, edukasaun, defeza, rekursu mariñu, rekursu naturais, no teknolojia.

“Apezar distánsia jeográfika ne’ebé Timor-Leste ho Mosambique iha, nu’udár paíz irmaun, povu irmaun, sira mós desmontra teb-tebes sira-nia disponibilidade, sira-nia prontidaun atu bele apoia Timor-Leste iha área saida de’it,” Bendito Freitas hateten.

Durante enkontru, ministra Verônica Mocamo  ho nia elénku Governamentál partisipa hotu ko’alia kona-bá seitór saúde, edukasaun, defeza, rekursu mariñu, rekursu naturais, teknolojia importante tebes atu bele halo kooperasaun.

Iha biban ne’e mós, Ministru Negósius Estranjeirus Bendito Freitas, lori Governu Timor-Leste nia naran, agradese ba Governu no Povu Mosambique, ne’ebé apoia ona Timor-Leste iha tempu luta bá ukun rasik aan.

Tanba ne’e, Bendito espressa vontade hosi IX Governu Konstitusionál ne’ebé lidera hosi Primeiru-Ministru, Kay Rala Xanana Gusmão, atu fortifika liután relasoens bilaterais ho Mosambique liu-liu iha espasu luzófonia ho nasaun memhru CPLP sira.

Governu Mosambique mós sei konvida Timor-Leste atu partisipa iha espozisaun turízmu ne’ebé sei hala’o iha loron 8 to’o 11 fulan Agostu tinan ne’e iha Mosambique.

Jornalista: Vito Salvadór