Ministériu Sira Tenke Servisu Hamutuk Fó Solusaun bá Preokupasaun Povu

Hatutan.com, (11 Jullu 2024), Díli– Ministériu Prezidénsia Konsellu Ministru (MPCM) liuhusi Vise-Ministru Asuntu Parlamentár, Adérito Hugo da Costa, Kinta (11/07/2024), konvoka reiniaun ida   ho Diretór jerál no Diretór Ezekutivu kada liña ministériu hodi afirma  servisu hamutuk fó resposta bá preokupasaun ka problema sira ne’ebé povu enfrenta ne’ebé sai atensaun no levanta beibeik husi membru Parlamentu Nasionál sira iha Uma-Fukun kada sesaun plenária, Segunda ho Tersa.

Lee Mós: Setór Saúde Problema Tanba Inkapasidade Governasaun Xanana iha Planeamentu no Jestaun

Vise-Ministru asuntu Parlamentár, Adérito da Costa Hugo, prezide enkontru ho kargu xefia sira liña ministériu nian iha Sentru Kulturál Indonézia nian iha Díli, Kinta (11/07/2024). Foto/Tome da Silva

Iha fulan sira ikus ne’e, membru Parlamentu Nasionál sira, liuliu Bankada Opozisaun, hanesan FRETILIN, PLP ho KHUNTO, sempre tau kestaun bá problema iha área saúde, edukasaun no folin foos ne’ebé sa’e beibeik maske Governu kontrata ona empreza importadós foos ho subsídiu.

Vise-Ministru Asuntu Parlamentar Adérito Hugo da Costa transforma informasaun sira-ne’e bá kargu xefia sira iha liña ministerial atu bele ajuda ministru, vise-ministru no sekretáriu estadu sira buka solusaun bá situasaun sira preokupante bá povu nia moris.

“Iha oportunidade ida-ne’e husu ita  hotu presiza halo itropresaun bá pontu situsaun ida-ne’e, tenke hala’o knaar ida halo servisu bá povu no nasaun, tanba iha konfiansa ne’ebé  bá iha períodu ida-ne’e, selae ita susar loos, adminstrasaun públiku ne’ebé ho traballadór funsionáriu públiku no ajente administrasaun públiku liu ema rihun 50 buka ajuda fó rezultadu servisu ida di’ak ba interese komún,” antigu jornalista ne’e hateten.

Enkontru ne’ebé hala’o iha Sentru Kulturál Indonézia nian iha Díli ne’e, Adérito da Costa Hugo  mós husu bá liña ministériu sira atu implementa Dekretu-Lei sira ne’ebé mak durante ne’e liña ministériu sira aprezenta bá Parlamentu Nasionál hodi aprová  ona.

“Ministériu tenke foti papél ida desemina Dekretu-Lei sira ne’e bá públiku para sira bele hatene, la’ós de’it resposta bá preokupasaun deputadu sira nian iha Segunda-Tersa kada semana, maibé fó andamentu bá inisiativa lei sira ne’ebé mak iha sé autór bá lei mak la iha  koordenasaun ho perante públiku, públiku sira labele hatene saidá mak ministériu ne’e halo,”  Adérito Hugo da Costa hateten.

Jornalista Estajiária: Zita Menezes