HWPL Eskolla Hatutan.com ho Mídia 4 Seluk Sai Parseiru Promove Jornalizmu bá Pás iha Timor-Leste

Hatutan.com, (12 Jullu 2024), Díli-Organizasaun Mundiál Sosiedade Sivíl hosi Korea du Súl, HWPL (Heavenly Culture, World Peace, Restoration of Light) ka Kultura Lalehan, Dame Mundiál, Restaurasaun Naroman, eskolla Hatutan.com ho mídia nasionál haat (4) seluk tan nu’udár sira-nia parseiru estratéjiku hodi promove jornalizmu bá pás iha Timor-Leste.

Lee Mós: Jornalista Timoroan Sira Partisipa Formasaun Jornalizmu bá Pás

HWPL formaliza kooperasaun ho mídia nasionál lima bá promove jornalizmu pás iha Timor-Leste, Sesta (12/07/2024). Foto/Elio dos Santos da Costa

Mídia nasionál haat (4) seluk ne’ebé HWPL eskolla mós mak hanesan Radiu Liberdade Dili, Radiu Komunidade Comoro, SapNewsTL ho mídia LABEH. Ho nune’e, Sesta (12/07/2024), organizasaun mundiál bá promove no halo advokasia pás husi Korea du Súl ne’e formaliza kooperasaun liuhusi asina akordu ne’ebé hala’o iha salaun enkontru Konsellu Imprensa (CI, sigla portugés) Timor-Leste  

Akordu kooperasaun ne’e ho sentidu hakarak atu haburas kultura dame nian liuhosi habelar konsiénsia no forma opiniaun públika ho komprensaun kle’an liu kona-bá dame ka pás.

Koordenadór HWPL iha Departamentu bá Dame no Edukasaun, Flora Keum konsidera kooperasaun  ne’ebé asina ona ne’e sai nuudár pasu ida ne’ebé signifikativu, la’ós de’it bá organizasaun mídia lima ne’ebé sira halo kooperasaun, maibé mós bá povu Timor-Leste tomak ne’ebé sei simu relatóriu notísia hosi kanal mídia hirak-ne’e.

Tuir nia, buat hotu ne’ebé ema goza daudaun ne’e posivel tanba dame ka pás. Nune’e, bainhira laiha dame, maka buat ida ne’ebé ema valoriza labele eziste, ema-nia pose, ema-nnia família, mezmu ema nia moris rasik.

Flora Keum  fiar katak mídia nasional lima ne’ebé HWPL  eskolla hodi selebra ona akordu bele habelar kultura pás iha rai-laran tanba valór liu dame ka pás nu’udár legadu ne’ebé dura bá jerasaun future.

“Ha’u hato’o ha’u-nia respeitu ne’ebé kle’an bá Sua Exelénsia, Sekretáriu Estadu ida atu aprezenta iha ne’e no bá Konsellu Imprénsa Timor-Leste, tanba halo ona ida-ne’e sai posivel,” Flora Keum hatete iha diskursu.

HWPL ninia reprezenta ne’e agradese SEKOMS, CI, Jornalista no organizasaun média sira hotu, tanba liuhosi serbisu folin-boot ida-ne’e, sira hakarak atu transforma Díli bá sidade ida ne’ebé hakmatek liu, no bá rai Timor-Leste ida ne’ebé nakonu ho dame.

Asina akordu kooperasaun HWPL ho mídia nasionál lima bá promove jornalizmu bá pás iha Timor-Leste. Foto/Elio dos Santos da Costa

Espíritu HWPL nian, maka espíritu razaun voluntáriu nian. Prezidente Manhilli hatete ona katak atu harii mundu ida ne’ebé hakmatek la’ós depende bá ema seluk, maibé husi ema ida-idak nia aan rasik. Entaun esforsu ida ne’e bá duni Timor-Leste.

HWPL nia atinjimentu sira hosi tinan sanulu (10) mai to’o ohin loron, hala’o asaun liuhusi razaun voluntáriu, la’ós ho osan no sira halo eventu ne’ebé iha valór no nabilan liután.

“Ha’u hein katak ita mós bele hamutuk iha valór nobre dame nia okos no serbisu ho espíritu sakrifísiu atu atinje ida-ne’e,”  nia tenik.

Heavenly Culture World Peace and Restoration of Light (HWPL) maka organizasaun internasionál ida bá dame ne’ebé harii iha 25 Maiu 2013. HWPL maka organizasaun naun-governamentál ida ne’ebé rejistadu iha Governu Metropolitanu Seul Repúblika Koreia nian.

Organizasaun ne’e mós nia asosiadu ho Departamentu ONU nian bá Komunikasaun Globál (DGC) no iha Estatutu Konsultivu Espesiál ho Konsellu Ekonómiku no Sosiál ONU nian (ECOSOC).

HWPL implementa projetu foun tolu hodi rezolve kauza prinsipál sira konflitu nian no estabelese dame sustentável.

HWPL ninia inisiativa prinsipal sira mak hanesan, estabelesimentu lei internasionál sira ne’ebé bandu funu, restaurasaun bá konflitu relijiozu sira liuhusi aliansa relijioza sira, promosaun edukasaun bá dame hodi haburas embaixadór dame sira.

Projetu Dili Sidade Dame nian, (a) Mural Dame nian, Atividade Pintura Mural Dame iha Sentru Desportu Xanana, Atividade Pintura Mural Dame nian. (b) iha Edukasaun nian maka, Edukasaun Jornalizmu Dame nian, no Dame Ensinu superior.

Sesaun foto hamutuk hafoin formaliza kooperasaun HWPL ho mídia nasionál lima hodi promove jornalizmu bá pás iha Timor-Leste. Foto/Elio dos Santos da Costa

Iha biban hanesan prezidente CI Timor-Leste, Otélio Ote agradese bá organizasaun mídia lima ne’ebé konkorda ona hodi asina nota entendimentu nian ida ohin, no hein katak, sei hetan sorte ne’ebé di’ak.

Otélio Ote haktuir, molok ne’e CI fó tiha ona naran hosi organizasaun mídia nasional hotu ne’ebé rejistu iha CI bá HWPL atu komunika ho sira hodi bele estabelese kooperasaun iha projetu ida ne’e. Maibé, realidade ohin iha mídia lima de’it mak konsege komunika ho susesu to’o ohin loron formaliza kooperasaun ida-ne’e.

Ote afirma, CI hanesan sumbriña bá mídia sira iha TL, no iha nia mandatu mak, tenke asegura katak iha asesu informasaun bá sidadaun hotu-hotu, iha liberdade imprénsa, iha kompromisu hosi média sira no oinsá jornalista sira atu kumpri kódigu étika jornalista.

CI mós tenke asegura katak, koopera ho instituisaun barak para bele tulun hakbiit kualidade jornalizmu, eleva kapasidade profesionál, no mós kapasidade intelektuál.

Prezidente CI ne’e atualiza katak, progresu barak tebes, tanba tinan ida ne’e CI iha formasaun barak, koopera mós ho ABC International Development no mós UNDP bá elaborasaun lívru, manta-dalan sira ne’ebé hamutuk ho mídia sira lansa tiha ona iha tinan kotuk.

SEKOMS Expedito Dias Ximenes dada-lia ho Xefe Redasaun Hatutan.com, Francisco Belo Simões da Costa iha ámbitu asina akordu kooperasaun mídia nasionál lima ho HWPL iha Edífisiu CI. Foto/Elio dos Santos da Costa

Iha fatin hanesan, Sekretáriu Sekretáriu Estadu Komunikasaun Sosial (SEKOMS), Expedito Dias Ximenes, agradese bá CI ho nia konselleiru sira hotu, tanba bele esforsu hamutuk ho HWPL hodi realiza servisu hamutuk ida-ne’e, no ida ne’e importante tebes.

“Ita hotu hein katak, ho akordu ida-ne’e kolega sira, liu-liu mídia lima ne’e sei tau atensaun liubá iha pás. Tanba hanesan ohin hatete katak, laiha pás, laiha dezenvolvimentu no mós laiha dezenvolvimentu, laiha pás. Tanba ne’e, buat rua ne’e tenke la’o hamutuk. Ho ida ne’e maka jornalista, mídia, meius komunikasaun sosiál sira iha nia papél ne’ebé importante tebes,” Sekretáriu Estadu Expedito Dias Ximenes hateten.

SEKOMS Expedito Dias informa TL hanesan nasaun ne’ebé foin sai konflitu, nasaun joven, persiza duni atu kria pás no estabilidade hodi bele simu dezenvolvimentu iha rai-laran ne’e la’o ho di’ak.

Nia lori IX Governu nia naran agradese bá HWPL hosi Korea ne’ebé ho inisiativa atu apoiu no dezenvolve mídia iha Timor-Leste no SEKOMS mós iha kompromísu atu fó apoiu bá haforsa dezenvolvimentu instituisaun mídia sira iha rai-laran.

Jornalista: Rogério Pereira Cárceres