Parlamentu Nasionál Resesu Fulan-Rua

Hatutan.com, (16 Jullu 2024), Díli– Parlamentu Nasionál (PN) hahú resesu durante fulan-rua (2)  husi loron 16 fulan-Jullu to’o loron 16 fulan-Setembru 2024.

Lee Mós: CNRT husu PNTL ho PCIC Buka Hatene Ema Sira Partilla HOAX Kona-bá Stoke Ai-Moruk

Plenária Parlamentu Nasionál, Tersa (16/07/2024). Foto/Tome da Silva

Mézmu resesu, PN estabelese ona komisaun permanente ida ho nia kompozisaun deputadu na’in-16 husi Bankada CNRT, FRETILIN, PD, KHUNTO no PLP hodi haree bá atividade Parlamentu Nasionál no hala’o atividade plenária iha kada loron kuarta, kada semana atu hato’o nafatin preokupasaun povu nian.

“Ha’u sujere meza nafatin atu nune’e bele asegura kualkér tempu, bá kestaun plenária. Ha’u hanoin ita labele husik espasu mamuk no  kada semana ita tenke halo plenária dala-ida, tanba nune’e ita presiza hateten situasaun balu ne’ebé mak urjente tanba ne’e ami Bankada FRETILIN propoin plenária iha Kuarta-feira,  kada semana,” membru PN husi Bankada FRETILIN Antoninho Bianco hateten iha plenária PN,  Segunda (16/07/2024).

Xefe Bankada CNRT, Duarte Nunes husu atu iha resesu nia laran ne’e sé bele halo semana-rua mak halo plenária dala ida tanba ho razaun deputadu sira bá munisipíu ho distansia dook.

“Bá ha’u ita bá munisípiu dook karik ita atu  kada semana tenke mai hanesan funsionamentu Parlamentu baibain, ne’ebé ha’u hanoin semana-rua mak hala’o plenária dala-ida,” Duarte Nunes propoin

Xefe Bankada KHUNTO Deputadu António Verdial sekunda Bankada FRETILIN nian tanba situasaun agora ne’e presiza reprezentante povu servisu nafatin mezmu iha tempu resesu maibé situasaun agora mak ezizi atu Deputadu  servisu nafatin.

Prezidente Parlamentu Nasionál (PPN), Maria Fernanda Lay haktuir maiória hakarak plenária kada semana plenária ne’e igual no rejimentu regula duni hanesan ho deputadu sira-nia atividade durante períodu normal, ne’ebé la halo buat seluk diferente.

Jornalista Estajiária: Zita Menezes