MS Investiga Pesoál Saúde Ne’ebé Espalla Segredu Instituisaun iha Média Sosiál

Hatutan.com, (17 Jullu 2024), Díli—Ministériu Saúde (MS) sei halo hela investigasaun bá pesoál saúde ne’ebé mak publika  ka espalla segredu instituisaun saúde nian iha públiku, liu-liu iha média sosiál Facebook.

Lee Mós: Deskonfia, Nomeasaun Kargu Diretór sira INSPTL iha Tendénsia Favoritizmu

Edifisiu Ministériu Saúde iha Caicoli, Díli. Foto/Elio dos Santos da Costa.

Vise-Ministru Saúde bá Asuntu Fortalesimentu Institusionál, José dos Reis Magno dehan, regra loloos labele fó-sai segredu instituisaun nian bá públiku tanba hanesan profesionais saúde nian tenke iha konfidensialidade bá ema ida-idak no bá pasiente sira.

“Ami buka hela atu haree la’ós atu kastiga ema ida, maaibé haree bá iha profesionais saúde nian. Nia iha direitu hanesan funsionáriu públiku, maibé iha mós dever tenke kumpri. Ita labele halo buat hotu-hotu tuir ita nia hakarak no gostu de’it,” José dos Reis Magno hatán bá Hatutan.com hafoin partisipa sorumutu ordináriu Konsellu Ministrus iha Palásiu Governu, Kuarta (17/07/2024).

Governante ne’e preokupa tanba bainhira buat hotu kona-bá instituisaun nian até privasidade pasiente nian mak lekar sai iha média sosiál maka neneik-neneik komunidade sei la fiar ona instituisaun saúde nian.

Nia fó ezemplu katak, profisionál saúde ida sei labele fó-sai kona-bá pasiente a, b, c, d, nunka fó sai pasiente nia idade, hela fatin no seluk tán no tenke rai segredu metin. Maibé, bainhira iha kazu ruma mosu mak lori bá to’o ona iha parte autoridade judisiáriu sira nia liman mak sira husu informasaun ruma, pesoál saúde sira foin bele hateten sai kona-bá identidade hosi ema ka pasiente ida ninian.

“Mais, iha situasaun baibain, ita sei labele koalia buat ida ne’e, tanba dever ne’ebé maka funsionáriu sira ne’e, ida mak tenke-ser rai sijíliu ne’e tenke segredu. Labele ko’alia tun sa’e,” José Magno esplika.

Vise Ministru Saúde ne’e durante ne’e akompaña hela informasaun sira ne’ebé virál iha média sosiál ligadu ho problema sira seitór saúde Timor-Leste nian hanesan fali ema bazár iha merkadu.

Lee Mós: Nomeasaun Kargu Diretór INSPTL Bazeia bá Esperiénsia

Prontu Simu Krítika

Ministériu Saúde (MS) prontu nafatin simu krítika oioin hosi públiku kona-bá situasaun ka problema sira ne’ebé mosu iha seitór saúde nian, nune’e bele hadi’a liután.

José dos Reis Magno hateten ida ne’e hodi hatán bá Hatutan.com kona-bá preokupasaun Bankada Partidu Libertasaun Populár(PLP) katak veteranu Tera Mau-Bulak ne’ebé halo tratamentu saúde iha sala VIP Hospitál Nacional Guido Valadares (HNGV), Bidau maibé laiha produtu konsumáveis.

Ho nune’e, pesoál saúde sira haruka fali família pasiente lori ran bá halo fali ezame iha Klínika Dili Medical Center (DMC) hodi selu fali osan ho valór $40.

Vise-Ministru Saúde José Reis rekoñese duni, no asuntu ne’e parte Konsellu Administrasaun HNGV ko’alia ona ho Terra Mau-Bulak inklui família sira atu bele rezolve.

“Momentu ne’ebá deputada Maria Angelina bá iha ne’ebá kestiona buat sira ne’e, maibé sira ko’alia loos tiha ona. Ikusmai buat ne’e virál nafatin hela de’it iha média sosiál. Maibé atu hateten katak, buat ne’e rezolve hotu ona,” Vise Ministru Saúde, José dos Reis Magno hatán bá Hatutan.com.

Nia deklara katak, preukupasaun sira ne’e válidu tanba bainhira timoroan ida preokupa ho situasaun ruma, liu-liu situasaun sáude nian ne’e importante atu bele hadi’a.

Nia mós rekoñese katak, buat problema ruma ne’ebé mosu iha servisu saúde ne’e normál tanba buat hotu la perfeitu sá tán Timor-Leste sei dependente totál bá hela rai-liur, liu-liu bá iha área saúde ne’e governu la halo buat ida.

“Laiha fábrika ruma iha ne’e dehan atu halo paracetamol ida mós laiha. Ita depende bá iha ne’ebá. Ezemplu ita nian hotu ou ita laiha duni. ita tenke bá hola,” José dos Reis Magno hateten.

Maski nune’e, neneik no bebeik Governu sei esforsu nafatin atu bele hadi’a servisu atendimentu no kompleta fasilidade inklui medikamentus hodi bele atende di’ak liu tán komunidade.

Lee Mós: Setór Saúde Problema Tanba Inkapasidade Governasaun Xanana iha Planeamentu no Jestaun

Jornalista: Rogério Pereira Cárceres