UNITAL Estabelese Kooperasaun ho UMN-Jakarta

Hatutan.com, (17 Jullu 2024), Jakarta—Universidade Oriental Timor Lorosa’e (UNITAL), ho Universidade Multimedia Nusantara (UMN), Kuarta (17/07/2024), iha Tangerang-Jakarta-Indonézia, asina akordu kooperasaun hodi apoiu malu iha programa kapasitasaun rekursu umanus no programa sira seluk ne’ebé iha relasaun ho interese akadémiku nian.

Lee Mós: Ensinu Superiór Neen Asina Akordu ho HWPL Estabelese Edukasaun Pás

UNTIL estabelese kooperasaun ho UMN-Jakarta, Kuarta (17/07/2024).

Akordu kooperasaun ne’e asina husi Reitór UMN, Ninok Leksono no Vise-Reitór asuntu Relasaun no Kooperasaun UMN, Muliawati G. Siswanto ho Prezidente Fundasaun UNITAL, Major Jenerál  Cornelio Ximenes “Maunana Bobar Mate” no Reitór UNITAL, Joaquim de Jesus Vas.

Akordu kooperasaun UNTAL ho UMN ne’e realiza tanba fasilita  no esforsu sira husi mós emprezáriu Timoroan nu’udár mós na’in bá empreza ATRAMOR no Raya Media & Intertainment, Raul Lemos.

Diva Pop Indonézia no membru Parlamentu Indonézia, Krisdayanti ka koñesidu ho naran KD nia kaben Raul Lemos ne’ebé akompaña parte sira (UNITAL ho UMN) asina akordu ne’e, informa katak  akordu kooperasaun ne’e tau importánsia liu bá  estabelese komunikasaun ativu, fasilita formasaun bá dosente sira UNITAL nian, fasilita estudu komparativu entre estudante sira UNITAL ho UMN nian, inklui UMN oferta bolsu estudu bá timoroan liuhusi UNITAL kada tinan ema na’in-10 bá kontinua sira-nia estudu iha UMN.

UMN mós prepara nia peritu sira atu fasilita formasaun bá dosente  UNITAL nian ho intensaun atu hasa’e koñesimentu no kualidade ensinu aprendizajen iha UNITAL.

Troka prenda no fó apreisasaun husi UMN bá emprezariu Timoroan, Raul Lemos iha ámbitu asina akordu kooperasaun entre UNITAL ho UMN-Jakarta

Prezidente Fundasaun UNITAL, Major Jenerál Cornelio Ximenes “Maunana Bobar Mate” ho Reitór UNITAL,  Joaquim de Jesus Vas hato’o sira-nia apresiasaun no laran ksolok bá parte sira reitoria UMN nian ne’ebé prontidaun simu sira nia prezensa no agradese tebes bá kooperasaun ne’ebé asina ona entre parte hodi tulun malu bá dezenvolvimentu rekursu umanu iha Timor-Leste.

Liuhusi esforsu no komunikasaun ativa entre UMN ho CEO Hatutan.com, Raul Lemos ne’e, maka entre tinan 2021-2022 konsege haruka ona timoroan na’in-10 ne’ebé sai hanesan benefisiáriu bá bolsu estudu husi UMN hodi hala’o sira-nia estudu iha universidade refere iha Tangerang-Jakarta.

Jornalista: Vito Salvadór