Francisco Kalbuadi Lay ho Steve Bracks Deskute Dezenvolvimentu Setór Turizmu Timor-Leste

Hatutan.com, (18 Jullu 2024), Díli- Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay ho Reprezentante Espesiál Governu Austrália ba Greater Sunrise, Steve Bracks, Kinta (18/07/2024), hasoru malu  diskute  dezenvolvimentu setór turizmu iha Timor-Leste.

Lee Mós: Konsellu Ministru Fó Podér Tomak bá Vise-PM Francisco Kalbuadi Lay Asina Akordu Marrakexe

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay ho Reprezentante Espesiál Governu Austrália ba Greater Sunrise, Steve Bracks. Foto/Elio dos Santos da Costa

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay, haksolok tebes hodi simu belun di’ak Steve Bracks ne’ebé mak nu’udár reprezentante espesiál Governu Austrália ba asuntu Greater Sunrise nian.

Francisco Kalbuadi Lay afirma Steve Bracks hanesan belun di’ak ida ne’ebé dezde uluk kedas mai to’o agora sempre vizita Timor-Leste no área ne’ebé mak nia kontribui boot teb-tebes.

“Iha área Turizmu no ezemplu konkretu mak iha Balibo, Iha tinan hirak liubá kuandu ha’u asume kargu nu’udár Ministru Turismu hamutuk ho Steve Bracks  nia apoiu duni liu husi komunidade Austrália nian iha Melbourne ho Dili.”

Francisco Kalbuadi Lay hatutan Steve Bracks sei kontinua ajuda Timor-Leste iha dezenvolvimentu ekonómiku, liu-liu ihaáarea turizmu ne’e rasik.

Reprezentante Governu Australia ba Asuntu Greater Sunrise, Steve Bracks hateten enkontru ho vise Primeiru Ministru no Ministru Koordenadór ba Asuntu Ekonomiku no Ministru Turizmu no Ambiente Francisco Kalbuadi Lay  la’ós atu ko’alia deit kona ba Greater Sunrise maibé ko’alia mós kona-bá dezenvolvimentu ekonomia iha Timor-Leste liu-liu iha asuntu turizmu iha Timor-Leste.

“Enkontru ohin la’o fantástiku tebes,  tamba ne’e sei la kolia barak liu tan kona-ba asuntu Greater Sunrise tanba imi hatene iha loron tolu liubá halo ona vizita ba Kosta Sul no sei halo relatóriu ba governu no Primeiru-Ministru inklui lider sira seluk iha Timor Leste,” Steve Bracks hateten.

Steve Bracks iha kompromisu forte no hakarak mós atu promove setór turizmu Timor-Leste ba mundu. Nune’e, nia sei fila fali ba Austrália hodi aprezenta relatóriu ida kona-ba progresu preparasaun dezenvolvimentu Greater Sunrise iha Kosta Sul ne’ebé oras ne’e dezenvolve hela.

Jornalista: Vito Salvadór