SekJer ONU ho Xefe UNAMET Partisipa Selebrasaun Tinan XXV Konsulta Populár

Hatutan.com, (18 Jullu 2024), Díli- Sekretáriu Jerál (Sekjer) Nasoins Unidas (ONU), António Guterres ho Xefe UNAMET (United Nation Administration Mission In East Timor), Ian Martin, konfirmandu partisipa selebrasaun tinan XXI loron Konsulta Populár, 30 Agostu 2024.

Lee Mós: Konfirmadu, António Guterres Partisipa Selebrasaun Tinan 25 Referendum

Primeiru-Ministru (PM), Kay Rala Xanana Gusmão liu husi enkontru semanál ho Prezidente Repúblika José Ramos-Horta, Kinta (18/07/2024, informa Governu iha preparasaun másimu ba selebrasaun tinan XXV loron konsulta Populár ne’ebé sei konsentra iha arredores Portu Díli.

Logotipu CNRT ho Outonomia iha buletin votu konsulta popular, 30 Agustu 1999. Foto/Dok.Estadu

Primeiru-Ministru ho Prezidente Repúblika  ko’alia liu kona-bá preparasaun ba loron konsulta Populár 30  Agostu 2024, no mos vizita Papa Francisco tamba eventu rua ne’e besik malu tanba ne’e ulun moras oituan mas buat hotu la’o di’ak iha nia prosesu sira.

“Loron 30  Agostu,  importante iha ita nia istória, Sekretáriu Jerál ONU António Guterres mós mai, Ian Martin mai ho sira ne’ebé UNAMET nian mós mai, ne’ebé 30  Agostu ida-ne’e atu lembra ba sofrimentu, sakrifísiu no determinasaun inan-aman sira nian no povu tomak tamba ho sira nia sakrifísiu no determinasaun mak ita bele hetan ukun an,” Primeiru-Ministru Kay Rala Xanana Gusmão hateten.

Xefe Governu hatutan hafoin selebrasaun loron konsulta Populár, Timor-Leste hasoru kedas eventu importante no Istóriku mak vizita Papa Francisco.

“Ami na’in-rua Prezidente Repúblika ko’alia ba malu oinsá mak koordena didi’ak, no hein katak povu tomak sei sente kontente tamba 30  Agostu ita selebra povu-nia sakrifísiu bá determinasaun ukun rasik aan,” Komandante Ein-Xefe FALINTIL ne’e hateten.

Antes ne’e,  Primeiru-Ministru (PM) Kay Rala Xanana Gusmão hamutuk ho membru Governu  sira halo ona observasaun ba arredores Portu Díli, hodi hare fatin refere ne’ebé sei utiliza ba komemorasaun loron konsulta Populár bá dala-XXV (30 Agostu 1999-30 Agostu 2024).

Jornalista: Vito Salvadór