Xanana Sei Ta’es Membru Governu sira iha Jornada Orsamentál 2025

Hatutan.com, (18 Jullu 2024), Díli- Primeiru-Ministru (PM), Kay Rala Xanana Gusmão, sei halo avaliasaun ho rigór, identifika no ta’es planu membru Governu sira nian iha jornada orsamentál 2025.

Lee Mós: Bankada CNRT Apoia PM Xanana Halo Remodelasaun

PM Xanana Gusmão. Foto/Elio dos Santos da Costa

Primeiru-Ministru Kay Rala Xanana Gusmão hateten iha enkontru semanál ho Prezidente Repúblika, José Ramos-Horta, Kinta (18/07/2024), informa mós ba Xefe Estadu kona-bá instituisaun hotu-hotu atu prepara ona planu bá 2025, hodi haree bá orsamentu, tamba ne’e Governu iha hela jornada orsamentál.

Nia afirma ba kada instituisaun, se iha 2024 husu buat lima, maibé halo de’it buat rua, iha tinan 2025 labele husu buat hitu.

“Ha’u fiar o tamba halo buat rua iha tinan ida-ne’e  entaun fó tan ida halo tolu, labele husu tan hitu,” Primeiru-Ministru Kay Rala Xanana Gusmão  hateten ba jornalista sira iha Palásiu Prezidensiál.

Xefe Governu hatutan hirak ne’e hotu halo para Timor-Leste bele fila fali ba sistema uluk ne’ebé metin para hodi jere didi’ak osan estadu.

Iha 2016 Timor-Leste Primeiru lugar iha Asia tomak,  no kuartu lugar iha mundu tomak, tuir kritériu hotu-hotu ne’ebé kona-ba jere osan ne’ebé mai husi mina-rai.

Sei Halo Revizaun bá Lei Kriasaun I.P no E.P

Primeiru-Ministru (PM), Kay Rala Xanana Gusmão informa mós Governu sei halo revizaun bá lei kriasaun Institutu Públiku (I.P) no Empreza Públika (E.P) hodi halo balansu bá tabela salariál ne’e’bé sai preokupasaun públiku nian.

“Kona-ba I.P no E.P ami haree tiha ona buat ida ne’e, mas Governu anteriór lei iha ne’e, iha ne’ebá, ne’ebé atu haree buat sira ne’e hotu ita tenke modifika lei lubuk ida, ne’ebé ami iha hela revizaun,” Primeiru-Ministru Kay Rala Xanana Gusmão hateten.

Xefe Governu hatutan tanba lei sira ne’ebé sira kria fó ida-ne’e no ida ne’ebá, liga ho ida-ne’e, liga fali ho ida ne’ebá tamba ne’e  Governu ne’e sei haree no se ida de’it kurize tiha ona, tamba ne’e maka iha hela preparasaun atu hadi’a.

Auditoria Internasionál Laóos atu Persege Malu

Primeiru-Ministru Kay Rala Xanana Gusmão hateten auditoria internasionál ne’ebé IX Governu Konstitusionál sei halo atu hadi’a fali sistema ida uluk monta la iha responsabilidade, auditoria laiha.

“Ho buat sira ne’e hotu mak ami hasai ona konkursu ba auditoria internasionál tamba ami la’ós hakarak persege malu, lae.” Xanana Gusmão afirma.

Xefe Governu esplika aauditoria internasionál ne’e para hatudu ba futuru lider katak buat hotu-hotu tenke tuir regra, iha fali Governu seluk hakarak muda tun no muda sa’e, muda halimar ba depois auditoria sei mosu.

Jornalista: Vito Salvadór