Ema Balun Lori Veteranu Nia Naran Impede Projetu Reabilitasaun Estrada Alas Vila Bá Wedauberek

Hatutan.com, (19 Jullu 2024), Díli-Projetu reabilitasaun estrada husi Alas Vila bá Wedauberek, Suku Mahakidan, Munisípiu Manufahi, paradu besik fulan ona, tanba iha ema ka grupu balun lori veteranu nia naran bá halo impedimentu.

Ministru Obras Públiku (MOP), Samuel Marçal. Foto/Tome da Silva

Projetu reabilitasaun estrada ho distánsia kilómetru 23 ho valor orsamentu millaun $13,8  ne’e ezekuta husi kompañia internasionál CNI22 ne’ebé lansa diretamente husi Ministru Obras Públika, Samuel Marçal ho embaixadór Xina mai Timor-Leste, Wang Wenli iha loron 14 fulan-Juñu 2024.  

Empreza internasionál CNI22 nudár vensidor bá konkursu internasionál bá projetu, maibé to’o agora seidauk bele halo servisu tanba hetan impedimentu ho meius ameasa fízika nio presaun oioin bá traballadór sira iha terrenu husi ema ne’ebé lidera grupu balun  ho veteranu nia naran.

Ministru Obras Públikas, Samuel Marçal rona ona  informasaun kona-bá aktu impedimentu bá projetu ne’e no iha memomentu lansamentu fatuk dahuluk bá projetu ne’e, Ministru Samuel Marçal deklara kedas katak indivíduu ka populasaun ruma mak impede projetu ne’e, maka Governu sei hapara automatikamente alias kansela projetu ne’e.

“Kansela. Ne’e maka ha’u dehan, horiseik, iha impedimentu hosi ema balu, grupu balu halo impedimentu, ne’e mak aproveita tempu ohin, ha’u mós hato’o hotu bá Primeiru-Ministru, no primeiru-ministru husu bá ha’u atu haruka hapara lai kompañia ne’e, tanba tuir loloos sira parte ne’ebá kontente, agradese tanba sira hetan oportunidade primeiru tanba  iha fatin balu estrada  aat liu, mais, sira seidauk hetan, no sira ne’ebá mak hetan uluk buka impede fali,” Ministru Obras Públikas, Samuel Marçal hatán bá Hatutan.com hafoin informa situasaun ne’e bá Primeiru-Ministru Kay Rala Xanana Gusmão iha Palásiu Governu, Dili, Kinta (19/07/2024).

Ministru Samuel Marçal lakohi temi grupu sira ne’e nia naran, maibé, nia rona de’it katak iha grupu balu bá halo impedimentu lori veteranu nia naran Mézmu nune’e, foin lalais nia rasik promete ona bá autoridade lokál, bá katuas lia-na’in sira ho povu tomak iha ne’ebá, katak, kuandu iha impedimentu, sira mak rezolve.

Ministru Samuel Marçal hateten, sé sira la rezolve, Governu prontu atu muda bá fatin seluk, tanba Governu laiha tempu atu tuur loroloron  halo negosiasaun bá buat sira pertense ba ema balun de’it nia interese bá osan.  

“Mas, sé sira lakohi kolabora, hakarak impede  prontu, ita bele muda fali bá fatin seluk ne’ebé mós ema hein hela. Ne’ebé, ha’u hato’o bá Primeiru-Ministru mós konkorda para atu Primeiru-Ministru fó instrusaun ona bá ha’u, atu hato’o bá kompañia hodi retira lai ekipamentu sira ne’e hotu, muda bá fatin seluk, tanba sira lakohi kolabora atu halo estrada bá sira nian, prontu, ita bá halo bá fatin seluk,” Ministru Samuel Marçal hateten.

Hatán kona-bá karik tanba sá mak grupu sira ne’e halo fali impedimentu bá obra ne’e, governante ne’e dehan, dala-ruma tanba sira mós iha interese, ka hakarak atu kaer hotu projetu ne’e ka hakarak hetan porsentu husi projetu ne’e. Maibé, Ministru Samuel Marçal dehan, kompañia ne’ebé kaer daudauk projetu estrada iha Alas bá Wdauberek ne’e liuhosi prosesu konkursu internasionál

“La’ós sira mak manán, ema seluk mak kaer fali, ne’e lei laiha ida. Sira mak tuir tender, sé ita hakarak kaer, ita mai tuir tender, agora, ita la mai tuir tender, ema manán, depois ita mak kaer fali, ne’e lei ida ne’ebé mak hatete hanesan ne’e bá ita,” Samuel Marçal afirma.

Samuel Marçal husu bá grupu sira ne’e, karik mak tinan ne’e sira laiha oportunidade, tinan oin sira bele iha oportunidade. Tanba ne’e, la’ós dalan bá sira mak atu bá halo impedimentu ne’e.

Tuir kontratu ne’ebé Governu liuhosi MOP selebra ho Kompañia Internasional CNI22, projetu ne’e hala’o ho durasaun tempu tinan-ida, fulan-ualu tenke finaliza nia prosesu sira tomak.

Jornalista: Rogério Pereira Cárceres