Sei Foti Medida Própriu Hasoru Funsionáriu Tama Servisu Tarde

Hatutan.com, (19 Jullu 2024), Díli – Ekipa konjunta; Komisaun Funsaun Públiku (CFP), Komisaun Anti-Korrupsaun (CAC),  Inspetór Jerál Estadu (IGE) no Diresaun Nasionál Patrimóniu Estadu  (DNPE) iha hela faze diskusaun atu foti medida própriu hasoru funsionáriu sira ne’ebe mak tama servisu tarde no sai servisu sedu.

Lee Mós: Funsionáriu Públiku Uza Patrimóniu Estadu iha Loron Feriadu Tenke ho Órden Servisu

Vizita surpreza ne’ebé ekipa konjunta sira halo bà instituisaun Governu balun hatudu katak funsionáriu sira barak tam servisu tarde no sai servisu sedu. Balun fali, tama dadeer, mas asina tiha ona absénsia hodi dadeer to’o kedas ona loraik kada loron.

Prezidente CFP, Agostinho Letêncio de Deus. Foto/Elio dos Santos da Costa

“Ha’u atu dehan katak tenke toma responsabilidade ka sansaun ruma ba funsionáriu sira ne’ebé mak sempre tama servisu tarde hela de’it,” Prezidente CFP, Agostinho Letêncio de Deus hateten bá Jornalista sira iha salaun  Delta Nova, Díli, Sesta  (19/7/2024).

Iha Lei Komisaun Funsaun Públiku hateten katak kuandu funsionáriu ida ne’ebé mak tama servisu tarde sempre ko’a nia saláriu, tanba ne’e, ekipa konjunta agora la’o daudauk  atu hare bá aktu  sira hanesan ne’e.

“Ami hanoin katak modalidade ba sansaun sempre iha oioin mas CFP hanoin hanesan ne’e bainhira atu foti desizaun ruma presiza iha diskusaun ka reuniaun tanba ne’e mak agora daudauk lori ba iha reuniaun hodi deside tipu medida saida mak ita foti  hasoru ita-nia funsionáriu sira ne’ebe ba servisu tarde no fila sedu,” Agostinho Letêncio de Deus hateten.

Jornalista Estajiáriu :  Lazaro Pereira Quefi