Asaun Pasífiku Hasoru Governu ho FDCH hodi Ezije Mantein Programa Bolsa Hakbiit

Hatutan.com, (22 Jullu 2024), Díli– Estudante sira husi universidade iha teritoriu nasionál, Segunda (22/07/2027), halo asaun pasifika iha resintu Fundu Dezemvolvimentu Kapitál Umanu (FDCH) hodi ezije bà  FDCH ho Governu atu labele muda bolsa hakbiit ba fali bolsa parsiál.

Lee Mós: TL Hasoru Krize Kapitál Umanu

Asaun pasifisku husi estudante universidade sira kontra desizaun Governu muda Programa Bolsa Hakbiit bá Bolsa Parsiál, Segunda (22/07/2024). Foto/Tome da Silva

Progrma Bolsa Hakbiit ne’e aprova husi Governu da-VIII no implementa husi Ministériu  Ensinu Superior Siénsia no Kultura (MESSC) liuhusi Fundu Dezenvolvimentu Kapitál Umanu (FDCH) ho baze Diploma Ministeriál númeru 9/2021, 10 fulan-Marsu.

Programa Bolsa Hakbiit ne’e kria husi Governu anteriór atu fasilita família kbiit-laek  sira-nia oan ne’ebé hakarak eskola iha universidade maibé kbiit la to’o.

Programa ne’e kria kedas dezde 2021 to’o mai 2023 ne’e fó ona benefísiu bá estudante ho kondisaun família laiha kbiit hamutuk 3,754.  

Iha Governu dala-IX ne’ebé lidera husi Primeiru-Ministru (PM) Kay Rala Xanana  Gusmão, muda tiha programa Bolsu Hakbiit ne’e bá fali Bolsu Parsiál. Ho nune’e, benefisiáriu sira ne’ebé durante ne’e halo estudu iha universidade, hanesan Universidade Nasionál Timor Lorosae (UNTL), Universidade Dili (UNDIL), Universidade da Páz (UNPAZ), Iinstitute of Business (IOB), Universidade Nasionál Orientál (UNITAL),  Universidade Katólika Timor (UCT), Institutu Superiór Kristal (ISC) no seluk tan la satisfás. Nune’e husu atu Governu mantein prinsípiu hotu programa  Bolsu Hakbiit la’ós Bolsu Parsiál.

“Ami husu Governu atu fó solusaun emediata bá ami nian problema  ne’ebé ami hasoru, ita tenke halo diferensia entre bolsa parsial no bolsa hakbiit, enkuantu ami nu’udár bolsa hakbiit ne’ebé mak Governu oferese apoiu hahu husi tinan 2021 to’o mai 2023. Entaun Bolsa Hakbiit ne’ebé mak daudaun la’ós ona bolsa hakbiit, husi FDCH muda fali ami bá bolsa parsial. Ho ida-ne’e mak ami la konkorda, tanbasá saida mak muda ami tanba ami nia kontratu ne’ebé mak iha sei validu hela ami sei eskola no balu foin tinan ida tinan rua tanba saida mak Governu hapara ida-ne’e ami la konkorda hodi halo asaun pasifikú,” José da Costa nu’udár benefisiáriu husi programa Bolsa Hakbiit hateten bá jornalista sira.

Asaun pasifisku husi estudante universidade sira kontra desizaun Governu muda Programa Bolsa Hakbiit bá Bolsa Parsiál. Foto/Tome da Silva

Nia mensiona katak Governu  mantein ho desizaun  bolsa parsiál, estudante sira  mós sei mantein sira nian  manifestasaun  ka asaun pasífiku to’o iha solusaun ida final mak foin para.

Iha fatin hanesan Diretor ezekutivu FDCH  Julio Aparisio haktuir FDCH nu’udár instituisaun Governu  nian ne’ebé mak sei la foti desizaun bá problema referé tanba sira hanesan teknikamente hodi implementa saidá mak Governu deside.

“Hanesan diretór ezekutivu FDCH ha’u iha obrigasaun atu esplika bá sira no ko’alia ho sira maibé sira nia aspirasaun ami sei aprenzenta bá konsellu administrasaun, maibé desizaun ne’e la’ós iha konsellu adminitrasaun no sei aprezenta fali bá konsellu ministru depois mak Governu sei deside,” Julio Aparicio Pinto  hateten.

Nia mós husu estudante sira tenke estuda makaas  no FDCH prontu luta atu ajuda no estadu mós iha direitu atu kontrola no halo avaliasaun bá estudante hirak ne’ebé mak asesu bá osan estadu tanba ne’e osan estadu tenki uza didi’ak no aproveita didi’ak.

Jornalista Estajiáría: Zita Menezes