Autoridade Timor-Leste Prende Sigaru Manchester Kaixa 1013 Husi Kambodia

Hatutan.com, (22 Jullu 2024), Díli-Autoridade polísia Timor-Leste liuhusi ekipa konjunta;  Polisia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Servisu Nasionál bá Intelijénsia (SNI) ho Autóridade Adeuaneira (Alfandega) prende sigaru ho marka Manchester iha kaixa 1013 ne’ebé mak orijen husi Kambódia.

Lee Mós: Arguidu Hatama Sigaru Ilegál Simu Pena Suspensaun Tinan Tolu

Sigaru ho marka Manchester. Foto/Rogério Pereira Cárceres

Apreensaun bá sasán ilísitu  hirak-ne’e liuhusi  atividade inspesaun hala’o iha Sesta (18/07/2024) no iha Segunda ne’e foin identifika iha área Akadiruhun, Postu Administrativu Na’in-Feto, Munisípiu Díli.

Sigaru hirak ne’e importante hosi Kompañia D’CHAM UNIPESSOAL L.da, no identidade inisial hosi na’in bá kompañia ne’e maka DC no sigaru kaixa 1013 ne’e, kada kaixa ho kuantidade salop 50.

Autóridade Aduaneiru ka Alfandega liuhosi Xefe Departamentu Anti-Fraude, José Sarmento Freitas informa, sasán hirak ne’e tama dezde loron 02 fulan-Maiu 2024, Broker sira mak halo rejistrasaun iha Sistema ASKUDA, no Alfandega mós rejistadu iha Portu Tibar.

Hafoin rejistrasaun ne’e sistema fó kanál matak (verde), entaun, sasán sira bele sai de’it, Alfandega la halo verifikasaun. Bainhira kanál hatudu mean (vermella) mak Alfandega tenke halo verifikasaun, foin nia bele sai.

Autoridade Timor-Leste halo verifikasuan hikas bá kuantidade sigaru ilísitiu ne’ebé importa husi Kambodia, Segunda (22/07/2024). Foto/Rogério Pereira Cárceres

“Ida-ne’e nia sees hosi halo inspesaun. Sigaru ne’e nia orijen mai hosi Kambódia, depois nia hatete dehan la’ós sigaru, depois sira rejistu iha sistema ne’e dehan supermie, sé la sala iha dos 1013, ne’e sira deklara hanesan ne’e. Ita bele konsidera sira falsifika dokumentu,” Xefe Departamentu Anti-Fraude, José Sarmento Freitas, hatete bá Jornalista sira durante akompaña DIK Nasionl ho SNI sira halo re-konfirmasaun bá kuantidade sigaru sira ne’e kontájen iha Kuartel Jerál PNTL, Caicoli-Díli.

“Ita labele halo inspesaun bá ema nia sasán, tanba sistema fó nia kanál verde. Tanba ida-ne’e maka nia sai hosi Portu Tibar ne’e. Mais, iha karreta laran, superimie laiha, sigaru de’it. Signifika ne’e falsifika dokumentus,” tenik nia.

Informasaun ne’ebé Hatutan.com rekolla iha terrenu katak, sigaru ho kuantidade ne’e, tama iha territóriu nasionál besik fulan ida resin ona, no na’in bá empréza sira konsege lori bá fa’am to’o iha Munisipiu Lautem.

Forsa konjunta sira sobu fila-fali sigaru hirak ne’e, sura fila-fali, nune’e bele konfirma fali katak, loos duni ka lae, sigaru ho marka Manchester ne’e to’o duni nia kuantidade 1013. Hafoin ida-ne’e Investigadór sira iha DIK Nasionál sei aprezenta nia autus bá Ministériu Públiku (MP), atu prosesa tuir lei ne’ebé mak  vigora iha Timor-Leste.

Jornalista: Rogério Pereira Cárceres