Konsellu Ministru Fó Podér Tomak bá Ministru Marcos da Cruz Asina Akordu Konsolidasaun Kooperasaun Agríkola ho Xina

Hatutan.com, (24 Jullu 2024), Díli-Konsellu Ministrus hala’o sorumutuk iha Palásiu Governu,  Dili, Kuarta (24/07/2024), hodi deside no delibera fó podér tomak ba Ministru Agrikultura, Pekuária, Peska no Floresta, Marcos da Cruz, atu asina memorandu entendimentu entre Ministériu Agrikultura, Pekuária, Peska no Floresta, Repúblika Demokrátika Timor-Leste no Ministériu Agrikultura no Asuntu Rurais Repúblika Populár Xina kona-ba Konsolidasaun Kooperasaun Agríkola.

Ministru Agrikultura, Pekuária, Peska no Floresta (MAPPF), Marcos da Cruz.

Memorandu Entendimentu ida-ne’e ho objetivu atu hametin kooperasaun agríkola ho forma pragmátika, hadi’a seguransa ai-han, promove dezenvolvimentu ekonómiku no sosiál no hasa’e moris-di’ak populasaun nasaun rua ne’e nian.

Iha sorumutuk Konsellu Ministrus ne’e, haktuir iha komunikadu imprensa, delibera mós atu fó podér tomak bá Sekretáriu Estadu Komunikasaun Sosiál, Expedito Dias Ximenes, hodi asina memorandu entendimentu ida entre Repúblika Demokrátika Timor-Leste no Administrasaun Rádiu no Televizaun Nasionál Repúblika Populár Xina, ba kooperasaun iha ámbitu rádiu no televizaun.

Ministru Komérsiu no Indústria, Filipus Nino Pereira, halo aprezentasaun ida iha Konsellu Ministrus kona-bá inisiativa reativasaun no revizaun liña Kréditu “Fasilidade Garantia Kréditu Suave”, hodi propoin ninia transformasaun ba iha programa foun ida ho títulu “Fasilidade Garantia Kréditu Saudável”.

Halo revizaun bá programa ida-ne’e ho objetivu atu korrije kontradisaun sira ne’ebé observa ona, hadi’a liután efisiénsia no asesibilidade kréditu, no habelar/loke-tan atividade foun sira ekonomia nian. Mudansa sira inklui hadi’a modelu implementasaun no hadi’a rekizitus hodi hetan asesu.

Inisiativa ne’e ho objetivu atu promove no estimula investimentu privadu iha setor estratéjiku sira hanesan agrikultura, pekuária, peska, turizmu no indústria, ne’ebé esensiál ba kreximentu no diversifikasaun ekonomia nasionál.

Konsellu Ministru aprova mós projetu Rezolusaun Governu ne’ebé aprezenta hosi Ministra Finansas, Santina José Rodrigues F. Viegas Cardoso, kona-bá definisaun kompozisaun Komité Revizaun Polítiku ba Orsamentu Jerál Estadu ba tinan 2025.

Komité Revizaun Polítiku iha responsabilidade atu verifika alokasaun rekursus estratéjiku iha submisaun orsamentál, ho objetivu atu alkansa kompromisu no objetivu sira ne’ebé hatuur iha dokumentu estratéjiku sira no avalia viabilidade planu ba tinan finanseiru 2025.

Komité Revizaun Polítiku ne’e sei prezide hosi Primeiru-Ministru no kompostu mós hosi Vise-Primeiru-Ministru na’in-rua, Ministra Finansas, Ministru Obras Públikas no Ministru Planeamentu no Investimentu Estratéjiku. Sekretáriu Estadu Igualdade no Inkluzaun, Prezidente Institutu bá Defeza Direitus Labarik no reprezentante ida hosi Asosiasaun Defisiente Timor-Leste sei partisipa mós iha reuniaun Komité Revizaun Polítiku ne’e nu’udár observadór.

Reuniaun Komité Revizaun Polítiku ne’e sei hala’o hosi loron 12 to’o 27 fulan-agostu tinan 2024, iha Auditóriu Ministériu Finansas.

Jornalista: Rogério Pereira Cárceres