Taur Matan Ruak Prontu Kolabora ho Auditoria Ne’ebé Xanana Inisia

Hatutan.com, (24 Jullu 2024), Díli- Primeiru-Ministru  iha VIII Governu Konstitusionál,   Jenerál Reformadu Taur Matan Ruak,  prontu kolabora ho prosesu aauditoria internasionál ne’ebé IX Governu Konstitusionál lidera husi Primeiru-Ministru (PM) Xanana Gusmão  sei halo ho intensaun atu hadi’a jestaun institusionál hodi garante boa-governasaun.

Lee Mós: FRETILIN Dezafia Xanana Aselera Auditória bá Ró Haksolok ho Aviaun ZEESM

Primeiru-Ministru (PM) VIII Governu Konstitusionál, Taur Matan Ruak. Foto/Elio dos Santos da Costa

“Auditoria ne’e prosesu ida normál, ha’u laiha problema ho ida-ne’e. Ha’u laiha duvida no tenke halo auditoria,” Prezidente Partidu Libertasaun Popular (PLP) Taur Matan Ruak haktuir ba jornalista sira iha Kantina Matak Palásiu Prezidensiál, Kuarta (24/07/2024).

Belun boot PLP nian ne’e mós subliña liután Timor-oan hotu-hotu tenke kolabora no koopera, tanba ne’e, la bele iha ida mak hasees ka nega.

Iha fatin hanesan Prezidente Repúblika, José Ramos-Horta klarifika liután katak prosesu aauditoria internasionál ne’ebé IX Governu Konstitusionál sei halo hanesan “maun boot” Xanana rasik hateten ona katak auditoria ne’e  para atu hatene de’it problema saida la’ós atu halo persegisaun politika ruma.

“Auditoria ne’e la’ós ho motivasaun polítika, maibé ne’e para governu foun ne’e kompriende didi’ak sistema ne’ebé muda, hodi fila fali ba sistema ida hanesan uluk,” Prezidente Repúblika José Ramos-Horta.

Ramos-Horta mos subliña liután katak sistema aauditoria ne’e normal hanesan saida mak eis Primeiru-Ministru Taur Matan Ruak hateten ona.

Antes ne’e, Primeiru-Ministru Kay Rala Xanana Gusmão hateten iha enkontru semanál ho Prezidente Repúblika, José Ramos-Horta, Kinta (18/07/2024), informa katak auditoria internasionál ne’ebé IX Governu Konstitusionál sei halo atu hadi’a fali sistema ida uluk monta la iha responsabilidade, auditoria laiha.

“Ho buat sira ne’e hotu mak ami hasai ona konkursu bá auditoria internasionál tamba ami la’ós hakarak persege malu,” Xanana Gusmão afirma iha oportunidade sira bainhira hasoru malu ho jornalista sira.

Xefe Governu esplika auditoria internasionál ne’e para hatudu bá futuru lider katak buat hotu-hotu tenke tuir regra, iha fali Governu seluk hakarak muda tun no muda sa’e, muda halimar ba depois auditoria sei mosu.

Jornalista: Vito Salvadór