PNTL Konklui Identifikasaun bá Timoroan 34 Ne’ebé Deporta hosi Reinu Unidu

Hatutan.com, (26 Jullu 2024), Díli-Polisia Nasionál Timor-Leste (PNTL) liuhosi nia Departamentu Investigasaun Kriminál Nasional, Sesta  (26/07/2024), konklui ka finaliza ona prosesu identifikasaun bá Timoroan na’in-34 ne’ebé hetan deportasaun hosi Governu Reinu Unidu (Inglaterra).

Lee Mós: Reinu Unidu Sei Deporta Timoroan 500

Polísia trnasporta timoroan sira ne’ebé Reinu Unidu desporta mai Timor-Leste, Kinta (25/07/2024). Foto/Rogério Pereira Cárceres

Prosesu identifikasaun bá Timoroan na’in-34 ne’e, Investigadór sira hahú hosi tuku 08:00 dadeer, hodi rekolla sira-nia identidade loloos, hanesan naran, naturalidade ka fatin moris, períodu ne’ebé sidadaun sira sai hosi Timor-Leste hodi bá Inglaterra no nia razaun sira hotu. Hafoin identifikasaun, parte DIK Nasional deside haruka sidadaun sira ne’e fila bá ida-idak nia uma hamutuk ho família.

Iha 12 Juñu 2024, fulan kotuk, Ministru Negósiu Estranjeiru no Kooperasaun (MNEK), Bendito dos Santos Freitas, informa tiha ona katak, Governu Reinu Unidu ka Inglaterra sei deporta traballadór ka imigrante Timoroan hamutuk na’in-500 ne’ebé ho pasaporte RDTL viola vistu traballu Reinu Unidu nian.

Traballadór Timoroan na’in-500 ne’e sei fila gradualmente, no embaixadór João Paulo Rangel mós servisu makas loos iha ne’ebá, hodi hasoru malu ona ho autoridade sira Reinu Unidu nian.

Governu Inglaterra sei haruka fila uluk traballadór ka imigrante 500 hosi Kontinente Afrika no Asia inklui na’in-50 hosi Timor-Leste iha faze primeiru nian. Nune’e, Timoroan na’in-34 mak fila uluk ona mai Timor-Leste, no to’o Dili, iha Kinta, 26 fulan-Jullu 2024, no hela na’in-16 mak sei iha prosesu atu fila tán.

Traballadór Timoroan sira ne’ebé governu Reinu Unidu  deporta fila ne’e tanba sira uza de’it pasaporte Timor-Leste hodi servisu no viola regra imigrasaun iha Reinu Unidu.

Jornalista: Rogério Pereira Cárceres