Kazu Osan Millaun $3, WNI Na’in-rua Kumpri Prizaun Preventiva no Timoroan Ida Aprezentasaun Periódika

Hatutan.com, (30 Jullu 2024), Díli- Tribunál Judisial Primeira Instánsia Díli (TJPID), Segunda, 29 fulan-Jullu 2024, hahú hala’o primeiru interrogatóriu judisial bá arguidu SDP, MU no FCO bá kazu fati osan rihun $150 ne’ebé Policia Ciêntífica e de Investigação Criminal (PCIC) ho Servisu Nasional Intelijénsia (SNI) prende iha Sesta (26/07/2024).

Lee Mós: PCIC ho SNI Foti Tán Osan $128,450.00 iha Arguidu Sira-Nia Uma iha Liquiça ho Díli

PCIC akompaña arguido sira bá Tribunál, Tersa (30/07/2024). Foto/Elio dos Santos da Costa

Iha audiénsia primeiru interrogatóriu judisial, Ministériu Públiku (MP) promove arguidu sira ho krime tolu mak hanesan, Brankeamentu Kapitál (Aritgu 13), Burka Informátika (Artigu 268), no Asosiasaun Kriminoza (Artigu 188 iha Lei Kógidu Penál Timor-Leste nian).

Promosaun bá krime tolu ne’e, tanba arguidu sira envolve mós iha kazu dada osan millaun $3, hosi Millaun $42 ne’ebé hetan hack hosi sidadaun ho nasionalidade Nigeria  na’in-rua iha Banku Mandiri-Dili, Timor-Leste. Nune’e, parte MP rekomenda bá Tribunál atu aplika medida koasaun prizaun preventiva bá arguidu sira.

Hafoin rona tiha parte hotu, Tersa (30/07/2024), tuku-17:50 Otl, Tribunál Díli liuhosi despaixu ikus, deside ona hodi aplika medida koasaun prizaun preventiva bá arguidu na’in-rua ho inisial SDP no MU ho nasionalidade Indonézia ka WNI (warga negara Indonesia), no arguidu FCO nu’udár Timoroan hetan prizaun preventiva.

Audiénsia Primeiru Interrogatóriu Judisial ne’e prezide Juiza Albertino Neves, MP reprezenta hosi Prokuradór João Marques, Pedro Baptista no Domingos Gouveia Barreto. Arguidu SDP ho MU hetan asisténsia legál hosi Advogada Priváda Adelina Melo no Arguidu FCO ne’ebé oríjen hosi Munisipiu Baucau ne’e, hetan defeza hosi Defensór Públiku José Maria Guterres.

Ho desizaun Tribunál nian ne’e, PCIC ne’ebé mak halo atendimentu bá kazu ne’e transporta kedan arguidu WNI na’in-rua ne’e bá kumpri sentensa iha sentru prizional Becora. Enkuantu arguidu FCO ne’ebé hetan prizaun preventiva tenke aprezenta aan iha Ministériu Públiku,  kada semana, dala-rua.

Jornalista: Rogério Pereira Cárceres