Justisa & Krime
PCIC ho SNI Foti Tán Osan $128,450.00 iha Arguidu Sira-Nia Uma iha Liquiça ho Díli
Hatutan.com, (30 Jullu 2024), Díli-Ekipa konjunta kompostu husi Policia Ciêntífica e de Investigação Criminal (PCIC), Servisu Nasionál bá Intelijénsia (SNI) no akompaña hosi autóridade judisial sira, hanesan Tribunál Judisial Primeira Instánsia Díli (TJPID), Ministériu Públiku (MP), Defensória Públika (DP) inklui advogadu privádu sira balu, rekolla tán osan ho valór $128,450.00 iha arguidu AJFLDJS no DODSFF sira-nia uma iha Díli ho Liquiça.
Autoridade Polisiál sira bá foti osan iha arguido ida nia uma iha Liquiça, Tersa (30/07/2024). Foto/Rogério Pereira Cárceres
Osan ho valór rihun $50 foti iha Arguidu AJFLDJS nia rezidénsia iha Suku Maubara Lissa, Postu Administrativu Liquiça. Tuir fali, foti tan osan $28.050 iha ai-laran tanba arguido nia aman lori tiha ba subar. Enkuantu osan rihun $50 seluk, foti iha Arguidu DODSFF nia rezidénsia iha área Fomentu I, Postu Administrativu Dom Aleixo, Munisípiu Díli.
Osan ho valór rihun $100 ne’ebé rekolla iha arguidu sira-nia rezidénsia ne’e, ho baze bá rekerimentu husi Advogadu Privádu Octávio Cardoso, ne’ebé rekere bá Tribunál atu foti fila-fali tán osan ho montante rihun $100 ne’ebé asegura hela iha ninian kliente sira-nia rezidénsia. Ho nune’e, Tribunál liuhosi Juiz titulár Afonso Carmona mós konkorda hodi koopera ho autóridade judisiáriu sira hodi akompaña arguidu sira bá foti tán osan rihun $100 iha arguidu sira-nia rezidénsia.
Razaun Adovadu privádu hato’o rekerimentu ida ne’e, bele kompleta tán faktu ka evidénsia sira krime nian ne’ebé Ministériu Públiku promove mai Tribunál. Tanba ne’e iha Tersa (30/07/2024), haleu tuku 10:30 dadeer Otl, autóridade polisial ho judisial sira sai hosi Tribunál Díli bá kedas Liiquiça atu foti osan.
Iha fali tuku 11:30 oras dadeer, ekipa sira to’o iha arguidu AJFLDJS nia rezidénsia iha Liquiça Villa, foti uluk osan rihun $50 ne’ebé falun iha plástiku kór mean, no subar hela iha fahi-luhan laran.
Hafoin foti tiha osan hirak ne’e, ekipa sira fila-fali mai Dili, hodi kontinua rekolla tán rihun $50 seluk iha Arguidu DODSFF nia rezidénsia iha área Fomentu I, iha ona tuku 12:30 Otl.
Iha tuku 13:40, ekipa konjuntu sira lori hotu evidénsia osan rihun $100 ne’e, to’o iha Tribunál Díli. Hafoin to’o, Tribunál komunikadu kedas bá Banco Central Timor-Leste (BCTL) nia ekipa lori kedan mákina sura osan nian to’o iha Tribunál, hodi halo kontájen fila-fali bá osan hirak ne’e, nia valór to’o duni rihun $100 ka lae. Rezultadu ikus, serteza katak, osan hirak ne’e ho duni ninia totál rihun $100.
PCIC Rekolla $28,450
Iha oras tuir mai, tuku 13:40 oras meiudia, PCIC ekipa Servisu Sekreta sira halo tán apreensaun bá osan ho montante $28,450, la’ós ona iha uma, maibé iha ai-laran tuan, besik tasi ibun, iha ne’ebé arguidu AJFLDJS nia aman mak lori sai bá subar.
“PCIC asegura tán osan $28,450 iha Ai-Laran ida iha Liquiça, ne’ebé suspeitu nia Aman lori bá subar antes ekipa ne’ebé kompostu hosi Tribunál, MP no Advogadu sira bá Liquiça,” fontes konfirmadu hosi PCIC ne’e informa bá Hatutan.com.
Osan $28,450 ne’e tanba PCIC hamutuk ho SNI sira mak halo apreensaun, nune’e osan hirak ne’e lori hotu ona bá asegura iha PCIC, hodi sai hanesan evidénsia kríme.
Arguidu Nigerianu na’in-rua, VD, no USN, ho Arguidu Timoroan na’in-tolu FJFSdS, AJFLDJS no DODSFF ne’ebé iha Sábadu (27/07/2024) foin lalais, tuir primeiru interrogatóriu Judisial iha Tribunál Díli, Juiz titulár sei foti desizaun iha lokraik ne’e.
Jornalista: Rogério Pereira Cárceres