PLP Lamenta Atuasaun SEATOU, CNRT Husu Lori Bá Tribunál

Hatutan.com, (05 Setembru 2024), Díli– Parlamentu Nasionál lamenta no konsidera ho atuasaun Sekretáriu Estadu Asuntu Toponímia no Organizasaun Urbanizasaun (SEATOU), Germano Santa Brites Dias ho nia ekipa hodi baku rahun negosiante  ambulante sira  nian sasán ne’ebé dezumanu.  

Lee Mós: RDDU Lamenta Atuasaun SEATOU Hasoru Vendedór Ambulante sira

Atuasaun SETOU nian bá negosiante ambultante sira iha Díli, foin lalais ne’e. Foto/Repro Facebook

“Ami lamenta tebes ho atuasaun SEATOU nian. Bele dehan katak dezumanu la haree povu ne’e hanesan ema, la haree povu ne’e hanesan fatór importante iha ita-nia dezenvolvimentu no demokrasia ne’e husi povu ba povu,” Xefe Bankada PLP, Angelina Sarmento ba jornalista sira iha PN, Kinta (05/09/2024).

Nia hateten Governu iha devér tomak atu proteje povu ida-ne’e nian direitu ba atividade ekonomia ne’ebé mak povu halo. Nune’e husu Governu atu kria regra no kria kondisaun ba vendedór sira atu nune’e sira bele kontinua halo sira nian atividade negósiu iha fatin ne’ebé seguru no tuir oras atu nune’e labele okupa espasu públiku.

“Atuasaun ne’ebé foin daudaun viral iha média sosiál ne’e ami lamenta tebes tanba dezde uluk kedan iha plenária ami sempre fó sujestaun didi’ak ba Governu atu bele promove no defende ita nian negosiante ambulante sira iha públiku maibé Governu presiza de’it kria regra,” Deputada Angelina Sarmento hateten

Iha fatin hanesan Xefe Bankada CNRT Duarte Nunes haktuir katak merkadu Manleu sei sufisiente hela tanbasá mak vendedór sira mai fa’an iha estrada ninin nune’e hamosu engarrafamentu, nune’e nia husu vendedór sira atu kumpre nafatin regra sira ne’ebé mak iha.

“Ha’u haree situasaun no SEATOU nian servisu durante ne’e, sé karik nia halo sala ruma bele lori ba tribunál, maibé nia kumpre nia knaar no Governu ida-ne’e  buka atu hadi’ak situasaun sidade nian iha Timor laran tomak,” Deputadu Duarte Nunes haktuir.

Jornalista Estajiaria : Zita Menezes