Ró Berlin Nakroma Nia Mákina Ida Aat

Hatutan.com, (05 Setembru 2024), Díli—Ró Berlin Nakroma seidauk bele arranka bá Surabaya hodi halo Docking tanba oras ne’e daudaun mákina ida aat.

Lee Mós: 2024, APORTIL Utiliza $800.000 bá Manutensaun Berlin Ramelau-Nakroman

Tékniku sira hadi’a hela mákina Ró Belin Nakroma ne’ebé aat molok lori bá docking iha Indonézia. Foto/Elio dos Santos da Costa

Vogál I tékniku Autoridade Portuáriu Timor Leste, Institutu Públiku (APORTIL, I.P), Júlio Saldanha Barreto esplika, Ró Berlin Nakroma ne’e iha mákina rua, maibé agora daudaun ida de’it mak funsiona no ida a’at hela hodi difikulta atu halo docking. Maski nune’e, tékniku sira hosi empreza Dewa Ruci Agung Surabaya – Indonézia hadi’a  hela no iha tempu besik sei arranka bá Surabay hodi submete bá docking.

“Ita prepara ona docklis ne’ebé mak iha antes ne’e empreza ninia tékniku sira tun rasik mai iha ne’e no ohin sira sobu ona piston inklui segmentus balun ne’ebé tohar. Sira sobu tiha sei monta fali atu prepara hodi arranka bá docking,” Júlio Saldanha Barreto hateten iha portu Dili, Segunda (02/09/2024).

Tuir akordu ho APORTIL katak, durante semana rua nia laran tenke hadi’a hotu ona atu bele arranka maibé antes ne’e sei koko lai sai hosi Díli bá Ataúro atu haree kondisaun no bainhira iha buat ruma falla nafatin maka sei hadi’a fila-fali.

Orsamentu ne’ebé prepara atu bá docking hamutuk millaun $786 maibé ho montante ne’ebé mak fó-sai ne’e bazeia bá sasan ne’ebé agora sobu, nune’e bainhira sobu tiha maka iha buat balun falla entaun presiza tau foun no sei aumenta tán orsamentu bazeia bá kalkulasaun tékniku sira.

Tuir kontratu ne’ebé APORTIL halo ho empreza Dewa Ruci Agung atu bá docking ne’e ho durasaun fulan rua no bainhira docking ne’e la remata iha fulan rua nia laran maka parte rua sei altera kontratu ne’e.

Iha fatin hanesan diretór kapitazen diresaun servisu transporte maritima, Rolando Xavier hateten, tuir kritéria bainhira ró atu bá docking mákina rua ne’e tenke di’ak no funsiona hotu tanba ne’e tékniku sira hosi empreza haree ona buat hotu-hotu hanesan oli, piston no seluk tán atu bele hadi’a hodi bele arranka bá docking tuir kontratu ne’ebé iha.

Tanba ne’e, diretór ne’e informa bá públiku katak aprosimasaun tékniku sei hadi’a hotu iha loron 10 nia laran atu bele arranka bá docking.

Docking bá Ró hanesan prosesu ida hodi muda ró hosi área tasi-laran bá dock ne’ebé kompleta ho fasilidade apropriadu hodi bele halo manutensaun totál bá ró ne’e tomak.

Jornalista Estajiáriu:  Lázaro Pereira Quefi