Ambulánsia Multi-funsaun Unidade 13 Preparadu Asisténsia Emerjénsia iha Ámbitu Vizita Papa Francisco

Hatutan.com, (06 Setembru 2024), Díli-IX Governu Konstitusionál liu-hosi Ministériu Saúde (MS) prepara ona ambulánsia multi-funsaun unidade 13 hodi apoiu emerjénsia durante ámbitu vizita Papa Fancisco iha Díli husi loron 09 to’o loron 11 fulan-Setembru 2024.

PM Xanana akompaña simulasaun ekipa Ambulánsia ne’ebé preparadu atende emerjésia iha ámbitu vizita Papa Francisco. Foto/GPM

Ambulánsia multi-funsaun ne’e Governu Timor-Leste utiliza Orsamentu Jerál Estadu (OJE) 2024 nian kompras unidade  ualu (8), apoiu husi doadór, hanesan Japaun oferese unidade rua (2) ho Organizasaun Mundiál Saúde (OMS) oferese unidade  tolu (3).

Primeiru-Ministru, Kay Rala Xanana  akompaña hosi Ministra Saúde, Élia A.A dos Reis Amaral, Vise-Ministru Administrasaun Estatál, Jacinto Rogoberto de Deus no Sekretáriu Estadu Komunikasaun Sosiál, Expedito Dias Ximenes halo inspesaun bá karreta ambulánsia multi-funsaun 13 ne’e no asiste simulasaun  atendimentu emerjénsia ne’ebé hala’o iha Palásiu Governu, Sesta (06/09/2024).

PM Xanana Gusmão agradese bá OMS ho Governu Japaun ne’ebé tulun ona IX Governu Konstitusionál liu-liu iha ámbitu vizita Sua Santidade Papa Francisco.

“Ambulánsia sira ne’e di’ak, tanba kompleta kedan ho fasilidade médiku nian. Lori Governu nia naran agradese bá OMS ho Governu Japaun. Japaun apoia ita sein husu buat ida,” Hatutan.com sita iha komunikadu.

Xanana husu bá motorista sira atu kuida  ambulánsia no fasilidade sira ne’e liu-liu iha ámbitu vizita Sua Santidade Papa Francisco, hodi fó atendimentu bá sarani sira ne’ebé sei partisipa misa iha Tasi-Tolu iha loron 10 fulan-Setembru 2024.

Ambulánsia multi-funsaun ne’e kompleta kedan ho fasilidade médiku hanesan kama, oksijéniu no seluk-tán. Ministra Saúde, Élia A.A dos Reis Amaral informa, karreta ambulánsia ualu (8) ne’e sosa hosi Ministériu Saúde ne’ebé durante ne’e utiliza mós bá atividade saúde nian.

Jornalista: Rogério Pereira Cárceres