Governu ho Igreja Finaliza Preparasaun iha CCD ba Enkontru Papa Francisco ho Foin-Sa’e sira

Hatutan.com, (07 Setembru 2024), Díli-Governu hamutuk ho Igreja Katólika Timor-Leste finaliza ona preparasaun iha Centro Conveção Dili (CCD) ne’ebé sei sai fatin enkontru entre Papa Francisco no foin-sa’e Timoroan sira iha loron 11 fulan-Setembru 2024.

Lee Mós: Prezidente Repúblika ho Timoroan Hotu Preparadu ho Haksolok Simu Papa Francisco

PM Xanana akompaña husi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay halo observasaun ikus bá kondisaun CCD atu prepara bá enkontru Papa ho foin-sa’e sira. Foto/Elio dos Santos da Costa

Responsavel Governu ba iha CCD, Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay ba jornalista sira iha CCD, Sábadu (07/09/2024) hateten preparasaun no simulasaun ikus iha CCD ne’ebé halo husi ekipa tomak vatikanu nian hamutuk ho reprezentante Santa Sé iha Timor-Leste Mgr. Marco Sprizzi, inklui ho Igreja Lokál Timor-Leste liu husi Komisaun Nasionál Juventude Katólika (CNJC, sigla portugés), hamutuk ho foin-sa’e sira.

“Atividade tomak liga ho enkontru entre Pap Francisco no joven sira responsabiliza husi parte Igreja liu husi departamentu CNJC  no governu tau matan ba hadi’a kondisaun no ohin ita hotu haree katak prontu ona no simulasaun sira la’o ho susesu,” Francisco Kalbuadi Lay hateten.

Ekipa vatikanu apresia no louva preparasaun sira

Prezidente komisaun Nasionál Juventude Katólika, Pe. Francisco Indra do Nascimento Tei Seran hateten haree ba preparasaun sira ne’ebé iha la’o ho di’ak no susesu, tamba ne’e ekipa avansadu husi vatikanu apresia.

Nia afirma atu garante susesu ba atividade enkontru entre Papa Francisco no foin-sa’e sira, ekipa uma kreda hamutuk ho vatikanu no reprezentante Santa Sé Timor-Leste halo simulasaun durante loron haat (04 too 07 Fulan-Setembru).

Objetivu husi simulasaun ne’e atu oinsá fó provas ida ba ekipa avansadu husi vatikanu nune’e bele  hare balun ne’ebé seidauk klaru bele hadi’a no hetan klarifikasaun liután atu bele mellora kondisaun sira hodi fó susesu atividade ne’e tuir prosedimentu vatikanu nian.

“Simulasaun ikus ba loron ohin nian ne’e, hanesan simulasaun ofisiál ba simu Papa Francisco iha fatin ne’e. No parte ekipa avansadu husi vatikanu sira haksolok no kontente ho ita nia preparasaun hahú kedas husi entrada mai too iha enserramentu nian, hanesan saida mak Ita-boot sira mós akompaña,”  Pe. Francisco Indra do Nascimento Tei Seran hateten.

Tuir oráriu mobilizasaun ba juventude atu konsentra iha fatin enkontru iha CCD sei hahú iha rejistrasaun hahú 4h00 madrugada too tuku 7h00 dadeer, tanba ne’e, parte CNJCTL, sei koloka foin-sa’e sira ne’e balun sei toba iha eskola São Pedro Komoro no ba Foin-sa’e sira ne’ebé iha Dili mantein toba familia ida-idak iha uma no CNJCTL nafatin koordena atu foin-sa’e hotu-hotu mantein kumpre oráriu hodi fó susesu ba atividade.

 Observasaun Hatutan.com iha CCD, hare katak Primeiru-Ministru Kay Rala Xanana Gusmão mós ba observa direita kondisaun no preparasaun sira iha CCD.

Iha observasaun durante minutu 30 nia laran ne’e Xefe Governu haree rasik ho matan kondisaun, liu-liu fatin tur Papa Francisco nian, kondisaun jardín, kadeira ba joven sira tur no akompaña direita mos simulasaun ikus ne’ebé ekipa avansadu husi vatikanu mos iha no ikus liu molok fila Primeiru-Ministru ba vizita mos sala CCTV no audio visual ne’ebé instala iha CCD.

Jornalista: Vito Salvadór