Dezde 2015-2024, Estadu Timor Ne’ebé iha Asaun Porsentu 20,59 iha Timor Telecom La Simu Buat Ida

Hatutan.com, (24 Setembru 2024), Díli-Dezde tinan 2015 mai to’o ohin loron, Estadu Timor-Leste ne’ebé nia asaun purvolta porsentu 20,59 (20,59%) iha empreza telekomunikasaun Timor Telecom (TT) la simu buat ida hosi Timor Telecom ho razaun dehan Timor Telecom kontinua enfrenta dívida.

Lee Mós: Governasaun Xanana Halo Hela Avaliasaun bá Sosa Asaun Oi iha Timor Telecom

Foto/Timor Telecom

IX Governu Konstitusionál oras ne’e halo hela análize kle’an hodi tetu ho didi’ak kona-bá nia desizaun sira, molok deside hodi sosa kotu asaun (saham) empreza Telekomunikasaun Timor Telekom (TT).

Ministru Transporte no Komunikasaun (MTK), Miguel Marques Gonçalves Manetelu, hateten Estadu Timor-Leste mós iha asaun (saham) porsentu 20,59 (20,59%) iha Timor Telecom. Maibé, hahú tinan 2015 mai to’o ohin loron, Governu la simu buat ida hosi Timor Telecom, tanba sira iha duni problema kona-bá finanseira no kompañia ne’ebé mak nia asaun boot liu iha Timor Telecom, Empreza Oi S.A hosi Brazil, maibé nia mak enfrenta hela  problema finanseira, nune’e bele mós nia atu bankarrota, tanba ne’e maka sira atu fa’an tiha asaun Oi S.A nian iha Timor Telecom ne’e.

Ministru Miguel Manetelu dehan, hafoin Governu halo avaliasaun bá iha kontratu sira ne’ebé molok ne’e asina tiha ona, dala-ruma governu to’o bá konkluzaun katak, loos duni, Estadu Timor-Leste  investe 20,59% iha Timor Telecom, mais, husik lai bá Governu haree took saida mak atu akontese ho Timor Telecom, para depois, loron ida, governu bele haree fali buat seluk ida.

“Tanba ida ne’e hanesan ita sosa mate iha kaixaun laran. Be ema atu mate ona, ita bá sosa halo nusa. Mais, ne’e hanesan ha’u nia komentáriu ida. Ha’u bele hatete hanesan ne’e, buat ne’e atu mate ona, ita bá hamoris fali,” Ministru Manetelu hatán bá Hatutan.com hafoin partisipa iha enkontru konsellu ministru ordináriu nian iha Palásiu Governu, Díli, Kuarta (25/09/2024).

Ministru Miguel Minetelu mós kestiona ho Timor Telecom tanba Governu mós investe ka tau ninia asaun iha empreza telekomunikasaun ne’e, mais realidade, governu nunka simu ona osan ruma hahú kedas 2015 to’o ohin loron, no Timor Telecom  razaun katak, sei de’it dívida.

“Asaun ne’e 20,59%, mais, ita la simu ona osan hosi ne’ebá. Signifika ita mós lakon no ho razaun dehan katak, tanba osan ne’e lori selu de’it maka dívida ne’e. Ne’ebé, to’o ohin loron, ita-nia situasaun maka ne’e. Mais, bom. Prosesu ne’e la’o hela. Mais, podér ser governu haree katak, ita haree took sira, naturalmente sira atu la’o bá ne’ebé, depois mak ita haree,” Ministru Miguel Manetelu hateten.

Daudaun ne’e partisipasaun iha Timor Telecom kompostu husi Telekomunikasaun Públika Timor (TPT S.A) 54,01%, Estadu Timor-Leste (20,59%), VDT Holding Limited (17,86%), Júlio Alfaro (4,49%), ho PT. Partisipasaun SGPS S.A (3,05%).

Empreza Timor Telecom eziste iha loron 17 fulan-Outubru 2002 nu’udár sosiedade anónima dahuluk ne’ebé estabelese iha Timor Leste nu’udár operador telekomunikasaun hodi fó servisu bá timoroan oan balun.   

Hatutan.com tenta ona halo konfirmasaun ho parte sira Timor Telecom, maibé laiha ema ida husu autoridade Timor Telecom nian mak bele disponivel halo entrevista ho Hatutan.com kona-bá polémika dívida sira Timor Telecom nian durante ne’e.

Jornalista: Rogério Pereira Cárceres