Ramos-Horta Halo Vizita Privadu bá Austrália

Hatutan.com, (03 Outubru 2024), Díli–Prezidente  Repúblika no Laureadu Nobel ba Pás, José Ramos-Horta,  Kinta (03/10/2024), hahú vizita privadu ba Austrália to’o loron 12 fulan-Outubru  2024.

Lee Mós: Ramos-Horta Klarifika Sai Sasin bá Kazamentu Bella Galhos ho Iram

Prezidente Repúblika, José Ramos-Horta. Foto/Tome da Silva

Komunikadu imprensa ne’ebé Hatutan.com asesu, informa vizita Ramos-Horta nian ne’e organiza hosi Institutu Austrália ho eventu sira ne’ebé organiza hodi komemora ninia aniversáriu ba dala 30, parte ida hosi programa tinan tomak ne’ebé aprezenta lider proeminente balu ne’ebé aprezenta sira nia “ideia boot sira”.

Durante vizita ida-ne’e, Ramos-Horta sei partisipa iha enkontru nivel aas, hato’o diskursu públiku, no partisipa iha eventu akadémiku sira iha sidade oioin Austrália nian, inklui Sydney, Canberra, Hobart, no Melbourne.

Ramos-Horta sei aprezenta palestra ida kona-ba valór independénsia nian: Lisaun sira ne’ebé aprende hosi Timor-Leste nia dalan ba Liberdade, iha Sydney Opera House, hato’o palestra ba Klube Imprensa Nasionál iha Canberra no hasoru malu ho membru sira hosi Parlamentu Austrália nian.

Horta  nia vizita inklui mós vizita kortezia ho Governadór-Jerál Austrália nian, Honorável Sam Mostyn AC, enkontru ho australianu proeminente sira iha área polítika, negósiu no sira ne’ebé envolve ho solidariedade Timor-Leste nian, palestra no sesaun Pergunta no Resposta iha Universidade Tasmania, no partisipa iha eventu podcast diretu iha Universidade Victoria, hodi diskute kona-ba lideransa, tranzisaun karreira, no esperiénsia pesoál sira

Ramos-Horta subliña, vizita ida-ne’e reprezenta oportunidade importante ida atu hametin ligasaun sira entre Timor-Leste no Austrália.

“Ita-nia nasaun sira fahe istória ida ne’ebé riku no kompromisu ba estabilidade no prosperidade rejionál. Ha’u hein atu hasoru malu ho líder, akadémiku, no sidadaun Australianu sira atu esplora dalan oinsá ita bele hasa’e ita-nia interese mútuu sira no aprende hosi ida-idak nia esperiénsia sira,” Ramos-Horta hateten.

Vizita ida ne’e subliña parseria ne’ebé dura entre Timor-Leste no Austrália, hodi fó plataforma ida ba Prezidente Ramos-Horta atu fahe perspetiva úniku Timor-Leste nian kona-ba independénsia, dezenvolvimentu, no kooperasaun rejionál.

Jornalista: Vito Salvadór