Xanana Partisipa Simeira ASEAN bá dala-44 iha Laos

Hatutan.com, (07 Outubru 2024), Díli-Primeiru-Ministru (PM), Kay Rala Xanana Gusmão, Segunda (07/10/2024), arranka ona bá Repúblika Demokrátika Populár (RDP) Laos, hodi partisipa simeira Association of Southeast Asian Nations (ASEAN) bá dala-44 no ba dala-45 ne’ebé sei realiza iha loron  08 to’o loron 11 fulan-Outubru 2024 ho tema “ASEAN: Aumenta Konektividade no Reziliénsia”.

Lee Mós: IX Governu Sei Halo Auditória Hodi Kontrola Ezekusaun Kada Ministériu

Komunikadu imprensa ne’ebé Hatutan.com asesu relata  Xefe Governu Timor-Leste partisipa iha Simeira ne’e tanba hetan konvite hosi Primeiru-Ministru Laos, Sonexay Siphandone ne’ebé atualmente lidera Prezidénsia ASEAN nian.

Primeiru-Ministru Kay Rala Xanana Gusmão. Foto/Elio dos Santos da Costa

Iha sekuénsia konvite ne’e Xanana Gusmão sei partisipa mós iha simeira Xefe Estadu no Xefe Governu ASEAN nian bá dala-44 no 45 iha Vientiane.

Oras-ne’e daudaun Timor-Leste hanesan observadór ASEAN nian no tuir planu sei integra-an hanesan membru plenu iha tinan 2025.

Iha Simeira ne’e, Primeiru-Ministru akompañadu hosi Xefe Estadu no Xefe Governu nasaun membru  ASEAN nian ho parseiru sira mak hanesan Índia, Xina, Japaun, Kanadá, Estadus Unidus Amérika (EUA), Austrália, Nova Zelándia, Rúsia, Uniaun Europeia, Nasaun Unidas no Repúblika Koreia. Posibilidade sei marka prezensa mós hosi Sekretáriu Jerál Organizasaun Nasaun Unidas (ONU), António Guterres.

Hafoin partisipa simeira ASEAN, Xanana Gusmão sei kontinua nia vizita ofisiál bá Portugal iha loron 12 to’o loron 18 Outubru, ho ajenda atu hasoru-malu ho Prezidente Repúblika Portugal, Marcelo Rebelo de Sousa, Prezidente Assembleia Repúblika, Pedro Aguiar-Branco, no Primeiru-Ministru Portugal, Luís Montenegro.

Durante enkontru entre Primeiru-Ministru na’in-rua, sei ko’alia liu kona-bá kooperasaun iha área justisa, edukasaun no seguransa ne’ebé sei asina mós akordu bá programa kooperasaun estratéjiku ho Portugal bá tinan 2024 to’o 2028 mak hanesan; Programa Reabilitasaun, Patrimóniu no Turizmu; no akordu ida kona-bá infra-estrutura, hanesan sinál espansaun kontínua bá relasaun bilaterál ne’ebé forte.

Xanana mós sei hasoru-malu ho timoroan iha Portugal, Akadémiku portugeza no sosiedade sivíl, inklui atende konvite hosi Governu Rejionál Açores hodi vizita illa ne’e no koñese projetu oioin ho atividade ekonomia azúl.

Primeiru-Ministru mós sei hala’o reuniaun ho Sekretáriu Ezekutivu CPLP no reprezentante Estadu membru CPLP nian.

Iha vizita ofisiál ne’e, Primeiru-Ministru akompaña hosi Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Ministru Justisa, Sérgio de Jesus Fernandes da Costa Hornai, Ministra Edukasaun, Dulce de Jesus Soares; Ministru Ensinu Superiór no Siénsia, José Honório da Costa Pereira Jerónimo, Ministru Interiór, Francisco da Costa Guterres, Sekretáriu Estadu Komunikasaun Sosiál, Expedito Dias Ximenes; Prezidente Câmara Comércio no Indústria Timor-Leste (CCI-TL), Jorge Serrano; mídia no delegadu ofisiál sira seluk.

Tuir ajenda, hafoin fila hosi Portugal, Primeiru-Ministru Xanana Gusmão sei dezloka bá Indonézia atu asiste serimónia Posse Prezidente Repúblika Indonézia bá dala-8, Prabowo Subianto iha 20 fulan-Outubru iha Jakarta.

Durante vizita ofisiál Primeiru-Ministru Xanana Gusmão iha estranjeiru, Vise-Primeiru-Ministru no Ministru Koordenadór Dezenvolvimentu Rurál no Habitasaun Komunitária, Mariano Assanami Sabino mak sei koordena Governu.

 Jornalista: Rogério Pereira Cárceres