Ramos-Horta Agradese bá Apoiu Oioin Hosi Austrália

Hatutan.com, (09 Outubru 2024), Díli—Prezidente Repúblika (PR), José Ramos-Horta hasoru-malu ho Governadora-jerál Austrália, Sam Mostyn hodi hakle’an diskusaun bilaterál entre pais rua no agradese ba apoiu oiooin hosi povu Australianu bá Timor-Leste (TL) iha área oin-oin liu-liu tulun ona dezenvolvimentu ekonómiku iha país ne’e.

Prezidente Repúblika (PR), José Ramos-Horta hasoru-malu ho Governadora-jerál Austrália, Sam Mostyn, tersa (08/10/2024). Foto: Média PR.

Iha enkontru kortezia ne’e, Xefe Estadu ho Governadora Jerál diskute assuntu bilaterál entre nasaun rua nu’udár nasaun viziñu no iha ligasaun forte ho Timor-Leste nia história.

Lee Mós:  Ramos-Horta Halo Vizita Privadu bá Austrália

“Oportunidade ne’e Prezidente Repúblika agradese mós bá Austrália nia apoiu iha área oin-oin bá dezenvolvimentu Timor-Leste nian inklui apoiu sira durante vizita Papa Francisco mai Timor-Leste iha inísiu fulan Setembru,” Hatutan.com sita komunikadu.

Governadora mós espresa konfiansa bá atuál Xefe Estadu atu kontinua promove demokrasia no defende direitus umanus.

UNSW Kontinua Tulun Edukasaun TL

Prezidente Repúblika José Ramos-Horta husu atu universidade University New South Wales (UNSW), kontinua tulun edukasaun iha Timor-Leste liu hosi programa bolsu estudu bá Timor-oan sira hodi hasa’e liután kapasidade iha área enjeñaria, saúde no agrikultura.

Xefe Estadu hato’o assuntu ne’e iha enkontru ho autoriedade máxima UNSW ne’ebé lidera hosi Prof. Vlado Perkovic, iha tersa (08/10/2024).

Durante iha UNSW Prezidente Repúblika hala’o diskusaun ho estudante direitu no justisa hosi UNSW hodi ko’alia kona-bá jeopolítika no direitu umanus iha reziaun AZIA no mundu.

Iha UNSW, Ramos-Horta hasoru-malu mós ho autoriedade UNSW ne’ebé suporta makas grupu sira ne’ebé halo konservatóriu kona-bá bee no agrikultura iha Timor-Leste, husu atu apoiu hirak ne’e kontinua no direta ho povu iha baze.

Prezidente Repúblika José Ramos-Horta agradese mós bá UNSW ne’ebé fó ona oportunidade bá Timor-oan sira bele hala’o estudu iha universidade ne’e.

Jornalista: Vito Salvadór