TL-Laos Estabelese Kooperasaun iha Área Rua

Hatutan.com, (09 Outubru 2024), Díli—Governu Timor-Leste (TL) ho Governu Repúblika Demokrátika Populár (RDP) Laos, estabelese kooperasaun iha área rua, ida kona-bá troka direitu sira atu utiliza rai no edifísiu misaun diplomátika nian, no ida seluk maka izensaun vistu bá titulár pasaporte servisu ho diplomátiku.

PM Xanana Gusmão ho ninia omólogu PM Repúblika Demokrátika Populár (RDP) Laos, Sonexay Siphandone, sai sasin bá serimónia asinatura hodi estabelese kooperasaun kona-bá troka direitu sira atu utiliza rai no edifísiu misaun diplomátika nian, no ida seluk maka izensaun vistu bá titulár pasaporte servisu ho diplomátiku, iha Sentru Konvensaun Nasionál RDP Laos, tersa (08/10/2024). Foto: Media PM.

Haktuir iha komunikadu imprénsa ne’ebé Hatutan.com asesu, fó-sai katak, dokumentu kooperasaun ne’e asina hosi Ministru Negósiu Estranjeiru no Kooperasaun, Bendito dos Santos Freitas, no RDP Laos asina hosi Vise-Primeiru-Ministru no Ministru Negósiu Estranjeiru, Saleumxay Kommasith, iha Sentru Konvensaun Nasionál RDP Laos, tersa (08/10/2024).

Lee Mós: Xanana Partisipa Simeira ASEAN bá dala-44 iha Laos

Serimónia asinatura nota entendimentu hodi estabelese kooperasaun bilaterál ne’e, Primeiru-Ministru (PM), Kay Rala Xanana Gusmão ho ninia omólogu Primeiru-Ministru Repúblika Demokrátika Populár (RDP) Laos, Sonexay Siphandone, mak sai sasin.

“Asinatura akordu rua ne’e refleta ita-nia kompromisu mútua atu hametin liu-tán relasaun bilaterál entre Timor-Leste ho RDP Laos iha tinan sira tuir-mai,” PM Xanana Gusmão hateten iha komunikadu.

Xefe Governu konsidera TL ho RDP Laos iha relasaun amizade, tanba ne’e fiar katak sei iha oportunidade atu hametin liu tán relasaun hodi esplora área potensiál sira atu hasa’e kooperasaun.

Xanana Gusmão mós espresa sentimentu kontente no felisita RDP Laos ne’ebé assume Prezidénsia ASEAN nian ne’ebé susesu, hodi kontinua dezeja susesu iha Simeira ASEAN bá 44 no 45 ne’ebé sei realiza iha 09 Outubru 2024.

Nia dehan, Laos sai uma-na’in bá ASEAN durante situasaun ne’ebé difísil tebes iha tempu ida ne’ebé mundu enfrenta konflitu no krize oioin.

Xefe Ezekutivu TL ne’e haksolok tanba ASEAN bele hala’o papél hanesan estabilizadór iha asuntu globál sira, hodi promove toleránsia no pás.

Aproveita oportunidade ne’e, Xanana hato’o apresiasaun no agradese bá RDP Laos tanba fó ona apoiu no tinan oin bele sai membru plenu ASEAN nian.

Iha enkontru bilaterál ne’e, Primeiru-Ministru akompaña hosi Vise Primeiru-Ministru, Ministru Asuntu Ekonómiku no Ministru Turizmu no Ambiente, Francisco Kalbuadi Lay, Vise Ministra Asuntu ASEAN, Milena Maria da Costa Rangel, Embaixadór Timor-Leste iha Laos, Filomeno Aleixo da Cruz, Xefe Gabinete Primeiru-Ministru nian, Elizabeth Exposto no Diretora Jerál ASEAN, Elisa da Silva.

Jornalista: Rogério Pereira Cárceres