Tribunál Haruka CAC Halibur Tán Evidénsia Kona-bá Kazu Abuzu Poder iha MAPPF

Hatutan.com, (09 Outubru 2024), Díli-Tribunál Judisial Primeira Instánsia Dili (TJPID) liuhosi “Mandado de Busca Domiciliária e Apreensão” haruka Comissão Anti Corrupção (CAC) buka halibur tán informasaun no dokumentu sira ne’ebé bele sai hanesan evidénsia kríme nian bá kazu abuzu poder iha Ministériu Agrikultura, Peskas, Pekuária no Florestas (MAPPF).

Lee Mós: CAC Sei Rekolla Dadus no Investiga Projetu sira Adjudikasaun Direta iha MAPPF

Ekipa CAC rekolla tan evidénsia ka prova balun iha edifisiu MAPPF kona-bá kazu abuzu poder iha MAPPF. Foto/Elio dos Santos da Costa

TJPID nia “Mandado de Busca Domiciliária e Apreensão” ne’ebé ho NUC 0004/24.CACTL ne’e, husu CAC atu halo Buska iha Domisíliu ho possibilidade bá preende sasán ne’ebé mak bele iha ligasaun ho faktu hirak  ne’ebé mak investiga ona, tuir dispozisaun iha Artigu 37, númeru 2, hosi Konstituisaun RDTL, no Lei Kódigu Prosesu Penál iha Artigu 226, númeru 1, Alinea c, Artigu 168, númeru 1, no Artigu 170.    

Baze bá “Mandado de Busca Domiciliária e Apreensão”  hosi Tribunál ne’e, Kuarta (09/10/2024), haleu tuku 08:30 dadeer Otl, ekipa CAC nian tun bá halo kedas buska iha MAPPF, Comoro-Dili, halo ezekusaun.

Durante buska iha MAPPF, ekipa CAC hetan akompañamentu mós hosi membru Departamentu Investigasaun Kriminál (DIK), Polisia Nasionál Timor-Leste (PNTL).

Mandadu Busca nian iha Domisiliáriu no Apreensaun nian ne’ebé la’o besik rua ne’e, ekipa CAC konsege rekolla dokumentu luduk ida ne’ebé konsidera nu’udár evidénsia kríme.

Kazu abuzu poder ne’e, akontese iha Domingu (15/09/2024), iha ne’ebé deskonfia envolve hosi Dirijente ida ho identidade inisial RGG ne’ebé mak asume pozisaun nu’udár Diretór Jerál bá Servisu sira Korporativu nian iha Ministériu Agrikultura Peska, Pekuária no Floresta (MAPPF), kona-bá halo ajudikasaun direta bá projetu rehabilitasaun irigasaun Maliana nian bá ‘belun di’ak’, hodi ikus mai  sai virál iha média sosial sira.

Jornalista: Rogério Pereira Cárceres