Malázia Oferese Millaun $3 Mai Timor-Leste Liuhosi Programa Formasaun Diplomata Timoroan

Hatutan.com, (10 Outubru 2024), Díli-Primeiru-Ministru (PM), Kay Rala Xanana Gusmão agredese bá Governu Malázia ne’ebé ho inisiativa hodi oferese  Millaun $3 mai Governu Timor-Leste liu-liu Ministériu Negósiu Estranjeiru no Kooperasaun (MNEK) atu haforsa programa formasaun bá Diplomata Timoroan sira.

Lee Mós: Xanana Husu Nasaun sira Membru ASEAN Sai Modelu bá Unidade

PM Xanana hato’o agradesimentu bá Primeiru-Ministru (PM) Malázia, Anwar Ibrahim liuhosi enkontru bilaterál iha Sentru Konvensaun Nasionál (NCC, sigla inglés), Vientiane, Repúblika Demokrátika Populár (RDP) Laos, Kuarta (09/10/2024). Foto/Mídia GPM

Komunikadu ne’ebé Hatutan.com asesu, fó sai katak, PM Xanana hato’o nia sentidu agradesimentu ne’e durante enkontru ho ninia omólogu Primeiru-Ministru (PM) Malázia, Anwar Ibrahim iha Sentru Konvensaun Nasionál (NCC, sigla inglés), Vientiane, Repúblika Demokrátika Populár (RDP) Laos, Kuarta (09/10/2024).

“Agradese bá apoiu hotu-hotu ne’ebé Malázia oferese, partikularmente millaun $3 bá formasaun diplomata Timoroan sira no ita kontinua servisu hamutuk,” Hatutan.com sita iha komunikadu.

Malázia anúnsia estabelesimentu filiál dedikadu ida hosi Institutu Diplomásia no Relasaun Estranjeiru (IDFR), hodi fó formasaun bá diplomata Timoroan sira, enkoraza mós Timor-Leste atu haruka reprezentante sira bá objetivu ida-ne’e.

Iha komunikadu ne’e mós, Governu Malázia reafirma sira-nian kompromissu hodi aselera Timor-Leste nia adezaun bá ASEAN, ho objetivu bá progresu durante Prezidénsia Malázia nian iha tinan oin.

Xefe Governu Malázia fó konsellu bá Timor-Leste atu hasa’e foku bá pilár ekonómiku atu fornese mós atualizasaun regulár kona-bá progresu.

Líder rua ne’e mós diskute kona-bá vizita ofisiál Timor-Leste nian bá Malázia iha tinan ne’e nia rohan, iha ne’ebé sei aborda liu-tán tópiku sira-ne’e ho assuntu bilaterál sira seluk.

Delegasaun Timor-Leste ne’ebé akompaña PM Xanana iha enkontru bilaterál ne’e kompostu hosi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministra Solidariedade Sosiál no Inkluzaun, Verónica das Dores, Vise Ministra Asuntu ASEAN, Milena Maria da Costa Rangel, Embaixadór Timor-Leste iha Laos, Filomeno Aleixo da Cruz no Xefe Gabinete Primeiru-Ministru, Elizabeth Exposto.

Jornalista: Rogério Pereira Cárceres