PM Xanana Agradese AIPA Ne’ebé Apoia Bebeik Timor-Leste Nia Adezaun bá ASEAN

Hatutan.com, (10 Outubru 2024), Díli-Primeiru-Ministru (PM), Kay Rala Xanana Gusmão, orgullu no agradese bá ekipa Assembleia Inter-Parlamentár ASEAN (AIPA) ne’ebé durante ne’e fó bebeik sira-nia apoiu tomak bá prosesu adezaun Timor-Leste (TL) nian iha Association of Southeast Asian Nations (ASEAN).

Lee Mós: Xanana Husu Nasaun sira Membru ASEAN Sai Modelu bá Unidade

PM Xanana iha okaziaun enkontru ho líder sira ASEAN nian ho Reprezentante Asembleia Inter-Parlamentár ASEAN (AIPA) iha Viensiana, Repúblika Demokrátika Populár (RDP) Laos, Kuarta (09/10/2024). Foto/Mídia GPM

Xanana Gusmão hato’o apresiasaun ne’e liuhosi deklarasaun jerál iha Okaziaun Enkontru ho Líder sira ASEAN nian ho Reprezentante Assembleia Inter-Parlamentár ASEAN (AIPA), iha Viensiana, Repúblika Demokrátika Populár (RDP) Laos, Kuarta (09/10/2024).

“Ami elójia no louva Assembleia ne’ebé servisu hodi fó apoiu no armoniza inklui haforsa kuadru sira lezislativu atu aliña ho norma sira no prátika ASEAN nian,” Xanana hateten iha komunikadu imprensa ne’ebé Hatutan.com asesu.

Xanana deklara katak, Timor-Leste sai ona observadór iha Asembleia Inter-Parlamentár ASEAN nian hahú kedas tinan 2018 iha Singapura. Alende ne’e, Timor-Leste sai ona testemuña bá Asembleia hodi enkoraza diálogu, servisu hamutuk ho kompriensaun entre Parlamentu hosi nasaun membru ASEAN.

“Ita haree ona oinsá rekomendasaun hosi asembleia ne’ebé ajuda Parlamentu Nasionál hodi tradús prioridade sira rejionál nian iha lei sira no polítika nasionál. Parlamentu Nasionál Timor-Leste apoia akordu rejionál,” Xanana hateten tán.

Oportunidade ne’e, Primeiru-Ministru aprezenta Timor-Leste estabelese ona Komité ad-hoc ne’ebé enkarregadu hodi ratifika akordu Protokolu ASEAN nian, promulga Lezislasaun relevante sira, monitoriza implementasaun akordu sira ne’e, no reprezenta interese povu timorense iha forum rejionál sira.

Ho partisipasaun ativamente iha atividade sira AIPA nian, Timor-Leste hetan koñesimentu no apreende prátika di’ak sira ne’ebé haforsa liu-tán prossesu sira lezislativu no estrutura governasaun nian.

Xanana Gusmão re-afirma fila-fali kompromisu Timor-Leste nian atu kompleta prossesu sira interna bá akordu prioritáriu sira iha pilár tolu Komunidade ASEAN nian iha tinan oin no espera kolaborasaun kontínua ho membru sira Parlamentu ASEAN nian ho parseiru dezenvolvimentu sira iha medida esforsu servisu hamutuk bá adezaun Timor-Leste atu sai membru plenu ASEAN.

Partisipa iha asembleia ne’e maka líder sira ASEAN nian, Prezidente Assembleia Inter-Parlamentár ASEAN, deputadu sira Parlamentu no Sekretáriu-Jerál AIPA, delegadu sira no Parlamentu Timor-Leste partisipa hosi deputada Lídia Norberta no Deputadu Augusto Domingos ‘Deker’ hosi Komisaun B Trata Assuntu Negósiu Estranjeiru, Defeza no Seguransa.

Jornalista: Rogério Pereira Cárceres