Notariadu Seidauk Simu Keixa Kona-bá Jogadór Selesaun Nasionál sira Uza Pasaporte Rua

Hatutan.com, (11 Outubru 2024), Díli- Diretór Diresaun Jerál bá Servisu Rejistu Notariadu (DJSRN), Agostinho Gonçalves Vieira, informa to’o oras ne’e parte Notariadu seidauk simu keixa ruma ne’ebé kontesta kona-bá sidadaun ida hetan pasaporte rua.

Lee Mós: Fundadór no Antigu Jogadór Selesaun Nasionál Ezije FFTL Responsabiliza Aktu Falsifikasaun Idade

Diretór Agostinho Gonçalves Vieira, dehan asuntu ne’e, hodi hatán bá Hatutan.com kona-bá notifikasaun hosi Asian Football Confederation (AFC) hasoru Federasaun Futeból Timor-Leste (FFTL) tanba iha falsifikasaun idade bá jogadór ekipa selesaun nasionál Jaimito António da Costa Soares ho António da Costa Soares Moniz.

Hatutan.com halo entrevista ho Diretór Diresaun Jerál bá Servisu Rejistu Notariadu (DJSRN), Agostinho Gonçalves Vieira, Sesta (11/10/2024). Foto/Elio dos Santos da Costa

Informasaun ne’ebé Hatutan.com asesu husi antigu jogadór selesaun nasionál sira ho mós fundadór Federasaun Futeból Timor-Leste (FFTL) sira katak durante ne’e sira mós nota indivíduu jogadór balun iha pasaporte rua ho idade ne’ebé la hanesan.  Pasaporte ida ho idade loloos tuir sertidaun batizmu nian no pasaporte selu fali falsifika hodi hatún sira sira-nia idade loloos.

  Deskonfia katak, kazu sira kona-bá falsifikasaun dokumentu nian ne’e, mai kedas hosi instituisaun relevante sira iha Timor-Leste liu-liu parte Servisu Rejistu no Notariadu rasik, inklui indivíduu balun servisu iha kartóriu Parókia sira hodi falsifika ema nia sertidaun batizmu hatun ema nia idade atu bele asesu ba trata dokumentu sira hanesan sertidaun RDTL, Billete Identidade (BI) no Pasaporte.

Diretór Diresaun Jerál bá Servisu Rejistu no Notariadu, Agostinho Gonçalves Vieira, husu atu labele fiar informasaun sira ne’e, tanba AFC mak deteta duni, tenke hatudu prova ruma.

“To’o agora ha’u seidauk hatene. Ha’u nein atu hatene tán, só ita-boot husu ne’e mak ha’u foin hatene fali dehan falsifikasaun. Agora ita hotu ko’alia dehan ema falsifika dokumentu, prova ne’e, ita iha evidénsia tenke lori mai, katak, ema halo falsifikasaun duni,” Diretór Diresaun Jerál bá Servisu Rejistu Notariadu nian (DJSRN), Agostinho Gonçalves Vieira, hatán bá Hatutan.com iha ámbitu serimónia “Lansamentu bá Lívru Kódigu Notariadu nian” iha Sala Kafetária Ministériu Justisa, Caicoli, Sesta (11/10/2024). 

Hatán kona-bá informasaun katak, durante ne’e kada Jogadór selesaun nasionál sira, ema ida bele hetan asesu bá pasaporte rua to’o tolu, diretór Servisu Rejistu Notariadu ne’e esplika, mákina bá imprime nian hanesan sistema ida ne’ebé mak dijitalizadu. Nune’e, bainhira ema ida mak tenta atu halo pasaporte rua, ne’e sistema deteta kedas. Tanba ne’e mak durante ne’e notariadu seidauk rejista iha kazu kona-bá dupla pasaporte.

“Lae, ne’e ema inventa de’it. Pasaporte ne’e, sistema ne’e ida de’it. Ne’ebé, ó atu inventa mós sistema leno kedas. Sistema ne’e selesaun iha, pasaporte ne’e ita atu print ne’e, sistema ka mákina ne’e seleksi molok pasaporte ne’e sai. Ema ida hasai pasaporte dala-ida de’it, sei la hasai dala-rua. Uainhira nia validade hotu ona mak foin bele renova. Mais, ema ida atu dupla ne’e laiha,” nia esplika.

Hatán kona-bá karik, molok ne’e parte Federasaun Futeból Timor-Leste (FFTL) halo pedidu ruma bá Notariadu atu fasilita halo pasaporte bá jogadór sira atu ema ida kaer pasaporte rua to’o tolu, nia dehan seidauk iha pedidu, tanba nia rasik mós foin mak bá asume kargu ida ne’e.

“To’o agora ha’u seidauk hetan, seidauk rona asuntu ida ne’e. Ema ida seidauk mai hato’o keixa. Mais atu hetan dupla ne’e, difisil, tanba sistema la simu ida. Sá tán, agora sistema eletróniku. Parese sira falsifika dokumentu ne’e antes seidauk tama sistema ne’e, bele. Mais, agora labele, difisil,” tenik nia.

Eis diretór DJSRN, João Borges, ne’ebé maka partisipa mós iha okaziaun “Lansamentu bá Lívru Kódigu Notariadu nian” ne’e, Hatutan.com halo mós konfirmasaun kona-bá nia mandatu sira molok ne’e hetan karik pedidu ruma hosi dirijente FFTL nian ne’ebé husu atu fasilita pasaporte rua ka tolu bá jogadór selesaun nasionál sira, maibé, eis diretór ne’e husu Hatutan.com atu bele konfirma de’it asuntu ne’e ho diretór notariadu atuál, tanba nia mandatu termina tiha ona, nune’e nia labele ko’alia tán.

Komité Disiplinár no Étika AFC hasai desizaun ne’e iha loron 25 fulan-Setembru ho Nú. Ref. VVC 20240925DC01, hodi fó penalidade ba jogadór selesaun nasionál Timor-Leste, Jaimito António da Costa Soares ho Id Card No. 06030410069970001 no António da Costa Soares Moniz.

Iha desizaun penalidade ne’e bandu atu jogadór Jaimito Antonio da Costa Soares ho António da Costa Soares Moniz atu partisipa iha kualkér eventu internasionál futeból nian durante tinan ida no ba jogadór Jaimito Antonio da Costa Soares sei selu koima ho montante $10,000.00 no ba jogadór António da Costa Soares Moniz selu koima ho valor $5,000.00, tamba iha duni faktu katak jogadór na’in-rua ne’e falsifika idade hodi partisipa iha jogu AFC U19 Championship 2020 (Qualifiers) ne’ebé kompete iha 2019 no AFC U23 Asian Cup 2022 (Qualifiers) ne’ebé kompete iha 2021.

Jornalista: Rogério Pereira Cárceres