Posivel, PNTL Demite Membru Na’in-tolu

Hatutan.com, (11 Outubru 2024), Díli-Komandu Polísia Nasionál Timor-Leste (PNTL) identifika  ona nia membru  na’in-tolu durante ne’e abandona servisu ka la hala’o ona kna’ar. Nune’e, Komandu PNTL liuhosi sorumutu ordináriu Konsellu Superior nian, Sesta (11/10/2024), diskute dadauk ona prosesu sira dixiplinár nian no posibilidade sei halo demisaun bá membru na’in-tolu ne’e.

Lee Mós: Suku Balun iha Ermera ho Manufahi Laiha OPS

Serimónia aniversáriu PNTL iha Bairru-Pité Díli, Kuarta (27/03/2024). Foto/Dok.Elio dos Santos da Costa.

Sekretáriu Konsellu Superior Komandu PNTL, Superintendente Xefe Polísia Jorge Amado Monteiro, hateten, membru sira ne’ebé abandona servisu iha instituisaun PNTL, balu bá ona servisu iha instituisaun estadu sira seluk, no balu mós bá tán tiha ona rai-liur.

“Ami halo diskusaun bá membru hamutuk na’in-tolu ne’ebé  abandora sira-nia servisu. Ida-ne’e maka konsellu deside atu hasai sira-nia naran hosi baze dadus PNTL nian,” Jorge Monteiro informa bá Jornalista sira iha Kuartel Jerál PNTL, Caicoli, Díli.

Tuir prosedimentu normál, membru hirak ne’ebé komete infrasaun dixiplinár, nia kastigu ne’e tenke demite hosi instituisaun PNTL, maibé presiza liuhosi prosesu diskusaun naruk ida enkontru konsellu superior Polísia nian.

Hosi rezultadu sira iha diskusaun iha Konsellu Superior Polísia ne’e maka Komandu PNTL sei submete bá iha Ministériu Interiór, hodi bele determina kona-bá rekomendasaun sira ne’e.

“Konsellu iha kompeténsia atu halo de’it diskusaun no rekomenda bá iha Ministériu Interior, hodi bele deside ema ne’e iha razaun ne’ebé  forte atu bele demite ka lae,” nia esplika.

Membru PNTL balu ne’ebé  abandona ona sira nia servisu ka muda ona bá iha instituisaun seluk, bele mós iha desizaun deside hasai sira hosi litas ka  baze dadus instituisaun PNTL  nian.

Parte komandu PNTL seidauk bele fó sai identidade hosi membru na’in-tolu ne’e, deviza saida, no destaka iha komandu munisípiu ida ne’ebé, tanba prosesu sei iha dikusaun laran, iha ne’ebé sei konsidera konfidensialidade.

Jornalista: Rogério Pereira Cárceres