Hatutan.com, (15 Outubru 2024) Dilí—Komisaun G ne’ebé trata asuntu Edukasaun Joventude Kultura no Sidadania iha Parlamentu Nasionál (PN) liu-hosi fiskalizaun detekta eskola públiku balun iha Dilí liu-liu Eskola Sekundária Jerál FINANTIL Ai-mutin akumula estudante na’in 80 iha sala ida.
Situasaun ne’e halo Komisaun ne’e preokupadu tanba durante implementasaun ezame nasionál estudante sira tuur besik malu de’it.
Lee Mós: Governu La Tolera Professór no Estudante Prátika Arte Marsiál iha Eskola
“Ezame nasionál foin hahú horisehik, komisaun G komunika no halo observasaun iha fatin balun ezame nasionál la’o di’ak. Maibé iha eskola públiku balun ho númeru finalista boot. Sala ne’ebé sira utiliza limitadu. Dalaruma komisaun organizadora halo jestaun mós susar oitoan atu koloka estudante tuir espasu normál,” Membru Komisaun G, deputadu Gabriel Soares haktuir iha PN, tersa (15/10/2024).
Komisaun G observa direta iha Eskola Sekundária Jerál FINANTIL Ai-mutin katák iha sala ida estudante na’in-80 mak okupa.
Nune’e Komisaun G rekomenda bá Ministériu Edukasaun atu haree situasaun ida-ne’e hodi bele aumenta halo konstrusaun edifisiu atu labele difikulta estudante sira-nia prosesu aprendizazen.
Iha fatin hanesan, deputadu Bankada FRETILIN, Antoninho Doutél Sarmento hateten, bainhira estudante sira hala’o ezame nasionál tenki iha espasu livre atu estudante sira iha ekilibriu bá estuda nomós bele responde pontu ezame ho di’ak.
Jornalista esforsu hodi halo konfirmasaun ho Diretór eskola FINANTIL, Aniceto Barlelo no nia parte rezeita katak informasaun ne’ebé komisaun G fó-sai ne’e la loos.
“Ha’u hanesan diretór eskola FINANTIL rezeita tanba ami foin lalais ne’e ezame hela segundu trimestre ami fahe turnu tolu, no tuur tuir regra nomál kada sala estudante na’in 25,” nia hateten iha knaar fatin Ai-mutin.
Nia dehan, eskola FINANTIL ho estatutu rai klaru tanba populasuan oferese rai ida-ne’e durante tinan 25 ona, maibé Governu seidauk tau-matan bá eskola ida-ne’e atu hadi’a.
Jornalista Estajiária: Zita Menezes
