Polísia Kaptura Ema Na’in-tolu Hafoin Hetan Labarik Timoroan ida Mate ho Trájiku iha Área Co Tyrone

Hatutan.com, (16 Outubru 2024), Díli-  PSNI (Police Service of Northern Ireland) kaptura ema nain tolu hafoin hetan labarik Timor-Oan ida ho idade tinan ida ho balun mate ho trajiku iha Co Tyrone iha área Tribunal Windmill iha Dungannon.

Labarik Timor-Oan ida ho idade tinan ida ho balun mate ho trajiku iha Co Tyrone iha área Tribunal Windmill iha Dungannon, 13 Outubru 2024. Foto/Espesiál

Sita husi notísia Belfas Telegraph.CO.UK, Segunda (15/10/2024) haktuir katak PSNI kaptura ona ema nain-tolu hafoin hetan labarik Timoroan ida ho idade tinan ida ho balun mate iha Co Tyrone iha Domingu, 13 fulan-Outubru 2024 no ida-ne’e hanesan insidente trajiku ne’ebé akontese.

PSNI hateten katak akontesimentu ne’e akontese iha área Tribunal Windmill iha Dungannon.

Membru konselleiru Social Democratic and Labour Party (SDLP), Karol McQuade hateten komunidade lokal iha fatin refere sente hakfodak ho notísia ne’e no hanesan xoke ida ba sira.

“Ba labarik ida-ne’ebé lakon ninia moris mak buat ne’ebé aat tebes no ha’u-nia hanoin no orasaun ba ema hotu ne’ebé simu todan ida ne’e. Susar atu espresa ho liafuan kona-ba situasaun hanesan ne’e,” Karol McQuade hateten.

Polisia investiga hela no husu ba públiku atu fó tempu no fatin ba sira atu hala’o sira-nia investigasaun. Buat ne’ebé importante liu mak hotu-hotu hatene ona saida mak akontese iha ne’e no situasaun ne’e mak sensitivu tebes.

Fermanagh and South Tyrone, Deborah Erskine MLA hatutan katak ida-ne’e hanesan insidente ida ne’ebé trajiku tebes, no  sei hamosu xoke boot ba komunidade lokal iha ne’e.

Labarik ne’e nia mate supreza tebes no hau nia kondolensia ba ema hotu ne’ebé sofre oras ne’e kauza husi insidente ne’e.”

“Faktu hotu kona-bá kazu ne’e tenke sobresai no investigasaun ne’ebé la’o hela bele konklui lalais. Hau husu ba komunidade atu la halo espekulasaun no husik polísia halo investigasaun,” Deborah Erskine MLA hateten.

Portavoz PSNI  hatete, “Mane ida no feto na’in rua, sira ho idade tinan 20, hetan kapturasaun tanba labarik ida mate iha fatin Tribunal Windmill iha Dungannon iha Domingu 13 Outubru.

Sei halo autopsia ba mate isin atu hatene kauza ka motivu lolos husi mate ne’e, tamba too agora sei hatene lolos motivu no seidauk iha informasaun detallu kona-ba ne’e.”

Jornalista: Vito Salvadór