Ramos-Horta Husu Populasaun Labele Halo Uma iha Foho-Lolon Rabilau

Hatutan.com, (19 Outubru 2024), Maubisi- Prezidente Repúblika, José Ramos Horta husu atu autoridade munisípiu Ainaro, Postu Administrativu Maubisi, Suku Maubisi Vila, atu tau-matan ba sítiu turístiku relijioza  Rabilau atu populasaun sira labele halo uma iha foho-lolon sira-ne’e.

Lee Mós: Aldeia Tolu iha Maubisi Kleur Ona Moris La Ho Eletrisidade

PR José Ramos-Horta ho komunidade sira asiste konsertu muzika iha festival Rabilau, Maubisi, Munisípiu Ainaro, Sesta kalan (18/10/2024). Foto/Lazaro Pereira Quefi

Ramos-Horta énfaze lia-hirak ne’e iha serimónia  enserramentu festival Rabilau, Sesta kalan (18/10/2024). Nia hateten autoridade sira hotu iha Munisípiu Ainaro liuliu Xefe Suku Maubise Vila, tau matan didi’ak ba rai ida-ne’e labele fakar lixu arbiru no husu ba populasaun sira hotu-hotu iha Rabilau labele halo uma iha foho-lolon sira tanba fatin ne’e sagradu.

“Populasaun sira hotu iha Rabilau  labele hahú halo uma iha foho-lolon sira ne’e tanba fatin ne’e Sagradu. Bá Munisípiu seluk hanesan iha Baucau, Oé-Cusse no iha ne’ebe de’it, ita se haree saida mak se halo iha ne’ebá no kada munisípiu ita bele hanoin atu tau atividade ida ho konkretu oin seluk labele halo hanesan de’it maibé kada munisípiu tenke halo atividade diferente espesífikamente ba munisípiu ida nian. Depois ha’u fiar governu ho autoridade lokál sira sei halo programa ruma kuda ai no mós dada bee-moos ho di’ak” José Ramos Horta hateten.

“Tinan kotuk ha’u mai iha fatin ne’e (Rabilau, red) ha’u haree fatin ne’e di’ak tebes iha rai-klaran, ha’u haree katak oinsá mak atu bele apoiu ba fatin ne’e atu halo festival ida ne’e sai festival ida permanente ba oin kada tinan di’ak liu tan  no boot liu tan,” Ramos Horta dehan.

Prezidente Repúblika hatutan tuir esforsu ne’ebe sira uluk halo iha tinan ida ne’e konsege realiza duni halo ema sira ne’ebé mai to’o iha Rabilau sente haksolok tebes ho saida mak akontese iha Rabilau ne’e rasik tan ne’e agradese ba autoridade no komunidade hotu-hotu iha Ainaro sai hanesan uma na’in ba festival Rabilau.

Jornalista Estajiáriu:  Lazaro Pereira Quefi