Ekonomia
MTK Prioritiza Instalasaun Kabu Submarinu ho Konstrusaun Aeroportu Prezidente Nicolau Lobato iha 2025
Hatutan.com, (21 Outubru 2024) Díli– Parlamentu Nasionál liuhosi Komisaun E trata asuntu Infra-Estrutura, Segunda (21/10/2024), halo audiénsia ho Ministériu Transporte Komunikasaun, hodi relata kona-bá porograma no atividade sira ne’ebé refleta iha polítika Orsamentu Jerál Estadu (OJE) 2025.
Lee Mós: MTK Bolu AACTL Haree Regra Sira Molok Deside Operasaun AirAsia
Orsamentu Jeral estadu (OJE) 2025 ne’ebé aloká bá administrasaun direita MTK nian iha $13,353,528 la inklui ajénsia sira ne’ebé tutela iha MTK nia okos.
Ministru Transporte no Komunikasaun, Miguel Marques Gonçalves Manetelu. Foto/Zita Menezes
“Planu prioridade 2025 ita kontinua konklui instalasaun kabu submarinu, hahú konstrusaun Aeroprtu Internasionál Prezidente Nicolau Lobato, halo estudu viabilidade bá portu Atauro bele mós bá Portu Com,” Ministru MTK Miguel Marques Gonçalves Manetelu informa bá jornalista sira hafoin remata audiénsia ho komisaun E-PN iha antigu edifisiu Ministériu Finansa, Díli.
Informasaun ne’ebé iha mós katak Mininstériu Agrikultura Floresta Pekuariu no Peská (MAFPP) liuhosi koopersaun ho ajénsia Japaun nian iha Timor-Leste KOICA halo ona estudu viabilidade bá Portu Com para konstrusaun bá portu peská.
“Estudu biabilidade portu Com nian haruka ona mai Ministériu Transporte Komunikasaun, ami sei haree hamutuk, sé dadus estudu viabilidade ne’e kompletu ona entaun ita la bá halo tán estudu viabilidade iha Com ita só halo de’it estudu viabilidade iha Portu Atauro,” Manetelu hateten.
Nia mós haktuir programa seluk ne’ebé MTK sei tau prioridade hodi halo konstrusaun terminal bá Munisípiu 13. Entretantu, Ministériu Transporte no Komunikasaun (MTK) nian ezekusaun (OJE) 2024 iha fulan-Outubru nian laran atinje 71%
Prezidenti komisaun E-PN, Deputadu Marcos Xavier haktuir proposta (OJE) 2025 MTK tau orsamentu $13,353,528 ne’ebé fahe bá kategoria lima;
- Saláriu Vensimentu $4,659,115.00
- Bens Servisu $6,336,53.00
- Transferénsia Públika $1,811,500.00
- Kapitál Menór $250 mill
- Kapitál Dezenvolvimentu iha $296,870.00
“MTK redúz tiha osan kapitál menor no kapitál dezenvomimentu, sira aumenta tán millaun $1 bá bens servisu, tanba iha 2025 iha mós kabu submarinu ne’ebé bele instala ona iha Timor entaun sira tenke rezerva osan bá liña intenet ne’ebé mak labele kotu,” Deputadu Marcos Xavier hateten
Komisaun E mós rekomenda bá MTK katák internet atu la’o di’ak tenke aselera lalais kabu submarinu no mós bá kontinuasaun projitu Aeroportu internasionál Prezidente Nicolau Lobato tenki la’o ona.
Jornalista Estajiária : Zita Menezes