Asosiasaun Futeból 13 Kongratula Kongresu FFTL Hili Komité Independente

Hatutan.com, (28 Outubru 2024), Díli- Membru Federasaun Futeból Timor-Leste (FFTL) hosi Asosiasaun Futeból Munisipál no Profisionál hamutuk 13 kongratula susesu ne’ebé FFTL iha liu husi Kongresu  Estraordináriu,  Sábadu (26/10/2024),  hodi estabelese ka hili komité independente sira nu’udár preparativu ba kongresu estraordináriu iha loron 11 fulan-Janeiru  2025.

Lee Mós: “Militar Invade” Kongresu Estraordináriu FFTL Hodi Hasai Aleixo Cobra

Asosiasaun Futeból Munisipál no Profisionál hamutuk 13 kongratula susesu ne’ebé FFTL iha liu husi Kongresu Estraordináriu. Foto/Elio dos Santos da Costa

Asosiasaun Futeból Munisipál no Profisionál sira ne’ebé halo konferénsia imprensa iha Xanana Sport Centre, Díli, Segunda (28/10/2024) mak hanesan Asosiasaun Futeból Bobonaro, Asosiasaun Futeból Baucau, Asosiasaun Futeból Lautem, Asosiasaun Futeból Liquiça, Asosiasaun Futeból Díli Oeste, Asosiasaun Futeból Remalau Ainaro, Asosiasaun Futebol Oe-cusse, Asosiasaun Futebol Viqueque, Asosiasaun Futeból Arbitrajen Timor-Leste, Asosiasaun Futebol Feminino, Asosiasaun Futebol Juvenil, Asosiasaun Futebol Salaun (FUTSAL) no klube kampiaun Primeira Divizaun Karketu Dili FC.

Porta-voz Asosiasaun Munisipál no profisionál, Nivio da Costa Fernandes, hateten liu husi konferénsia ba imprensa ida-ne’e hakarak deklara ba públiku no reafirma sira-nia pozisaun relasiona ho Kongresu Estraordináriu, katak  agradese no fó apresiasaun ba entidade sira-hotu hanesan Prezidente Interinu Federasaun Futeból Timor-Leste (FFTL) Tenente-Jenerál Domingos Raul “Falur Rate Laek”,  membru ezekutivu sira no membru Komisaun Organizadora, ne’ebé ezerse ona funsaun ho responsabilidade tomak hodi lidera asembleia tuir kompeténsia no protokolu.

“Kongresu la’ó ho di’ak no susesu tuir espetativa públiku nian hodi SALVA FUTEBÓL NASIONÁL atu labele hetan sansaun no suspensaun hosi FIFA no AFC liu husi Votus konfiansa Kongresista mak hanesan; Asosiasaun Munisipál, Profisionál no Klube hamutuk 17,” Nivio da Costa Fernandes hateten.

Ba partisipasaun reprezentante Federasaun Futeból Internasionál sira hanesan FIFA, AFC no AFF, ami apresia tebes ho imi nia apoiu no parseria ne’ebé kontinua iha esforsu ida-ne’e hodi akompaña prosesu tomak iha realizasaun Kongresu Estraordinária 2024.

Ami louva no fó apresiasaun tomak ba autoridade seguransa PNTL no F-FDTL, ne’ebé hala’o ona sira-nia kna’ar ho profisionalizmu hodi fó seguransa másimu hosi hahú, durante no to’o remata.

“Ami afirma mós ami-nia pozisaun tomak hodi depozita konfiansa másimu ba Prezidente Interinu FFTL Tenente-Jeneral Sr. Falur Rate Laek atu kontinua lidera FFTL to’o ba iha Kongresu Estraordináriu Eletivu ba pozisaun Prezidente Ezekutivu FFTL no membru ezekutivu nain ida (1), ne’ebé deside ona sei realiza iha dia 11 fulan Janeiru tinan 2025,” nia tenik.

Laiha dualizmu lideransa iha Asosiasaun Futeból Ainaro, Viqueque no Arbitrajen

Nivio da Costa Fernandes hateten Haktuir ba estatutu FFTL Artigo 26º Alinea 1, katak “Kongresu mak reprezenta autoridade suprema no lezislativa FFTL nian” ho nune’e, ami husu ba prezidente sesante sira hosi Asosiasaun Futebol Ainaro Giovanio Bucar, Viqueque Cosme Sarmento no Arbitrajem Aniceto Berlelo ne’ebé Komisaun Organizadora bandu ka la autoriza atu hola-parte iha Kongresu Estraordináriu dia 26 outubru 2024, ho razaun naran laiha lista delegadus no legalmente laiha ona autoridade formal ba lidera asosiasaun sira.

Tamba ne’e, husu atu labele tan reprezenta asosiasaun tolu (3) ne’e iha kualker atividades FFTL nian, no FFTL rasik rekonhese maka estrutura actual ne’ebé eleitu iha kongresu asosiasaun ho mandatu ba tinan 2024-2028:

Prezidente eleitu ba asosiasaun tolu ne’ebé iha maka Prezidente Asosiasaun Futeból Ainaro, Inácio da Cruz, Prezidente Asosiasaun Futeból Viqueque Jaime Sarmento no Prezidente Asosiasaun Arbitrajen Futeból Timor-Leste, Nívio da Costa Fernandes.

Refere ba Estatutu Asosiasaun Artigo 38° Alinea 1, katak Prezidente mak reprezenta asosiasaun legalmente”, signifika ami na’in tolu (3) maka iha lejitimidade atu reprezenta asosiasaun idaidak nian.

Husu KND Labele Interfere

Asosiasaun sira ne’ebé temi iha leten husu mos ba Komisaun Nasional Desportu (KND) atu labele halo interferénsia ho kualkér forma ba FFTL no nia membru sira, tamba FFTL sei jere ninia asuntu sira ho independente no sei garante katak ninia asuntu rasik la hetan influénsia hosi terseira parte ruma, haktuir iha estatuto FFTL Artigo 5º alinea 3 kona-ba “Neutralidade no Independénsia Institusional”.

Sekretáriu ezekutivu KND, Cesarino da Silva liu husi konferénsia ba imprensa ne’ebé hala’o iha edifísiu MJDAC, Lecidere, Sesta (25/10/2024) hato’o ona pozisaun katak Sekretáriu Ezekutivu KND mós sei halo análize kle’an ba polémika organizasaun FFTL nian tuir Lei baze Desportu, artigu 16 no Dekretu Lei nu. 60/2022 kona-bá kompeténsia Komisaun Nasional Desportu.

KND kaer nafatin ba independénsia organizasaun desportiva sira nian hanesan FFTL, maka KND husu ba FFTL atu kumpre nafatin estatutu nu’udár regra federasaun ba iha realizasaun kongresu tantu ba asosiasaun munisipiu no nasional.

Husu FFTL atu servisu hamutuk ho KND, CDTL no CONTL atu kria komisaun independente hodi normaliza tia problema sira hotu iha FFTL hodi rezolve problema ne’ebe akontese iha FFTL

KND rekomenda ba Governu hodi husu ba FIFA no AFC atu hamutuk ho governu kria komisaun independente ida, atu tau matan hodi realiza kongresu FFTL nian, nune’e bele hetan hikas kredibilidade ba membru sira no komunidade timorense.

Jornalista: Vito Salvadór